Оросын дор хаяж 11 мужийн захиргаа 2025 оноос эхлэн хүүхэд төрүүлсэн эмэгтэй оюутан, сурагчдад 100 мянган рубль (1000 ам.доллар) олгох болжээ. "7х7" сувгийн мэдээлснээр, ерөнхийлөгч Путины Украинд явуулж буй түрэмгийллээс үүдсэн хүн амын бууралттай тэмцэх кампанит ажлын хүрээнд 2025 оны нэгдүгээр сарын 1-нээс эхлэн Хүүхэд төрүүлэх урамшуулал хэрэгжиж эхэлнэ.

Сибирийн өмнөд хэсэгт орших Томск, Алтайн бүс нутгийн захиргаанаас залуу оюутан ээжүүдэд 100 мянган рубль олгохоо энэ долоо хоногт амласан. Үүнээс өмнө Оросын хойд хэсэгт орших Карелийн бүгд найрамдах улс урамшуулал олгохоо долдугаар сард зарласан бөгөөд амьгүй төрсөн тохиолдолд хамрагдахгүй гэж мэдэгдэж байжээ. Хүүхэд төрүүлэх урамшуулалд хамрагдах шалгуур нь бүс нутгаас хамаарч өөр, өөр байдаг.

Гэхдээ нийтлэг, хамгийн чухал шалгуур нь ээж болох гэж буй хүмүүс хүүхэд төрүүлэх үедээ 18-23, 18-25 насны бүтэн цагийн оюутан байх шаардлагатай.

Орос улсад эмэгтэй хүйстэй төрж, өссөнөөсөө болж олон хүүхэдтэй болох ёстой нөхөн үржихүйн дарамт шахалт өдөр ирэх тусам нэмэгдэж байна гэж зарим хүний эрхийн бүлгүүд буруутгах болжээ. Одоогийн байдлаар, тус улсын эрх баригчид хүүхэдгүй амьдралын хэв маягийг "хэт даврагч үзэл суртал" хэмээн хориглож, үр хөндөлт хийлгэхийг албадсан тохиолдолд шийтгэл оногдуулах болсон. Мөн улсаас олгох жирэмсний тэтгэмжийг урт хугацаатайгаар нэмэгдсэн үнийн дүнгээр олгох зэрэг төрөлтийг дэмжих бусад арга хэмжээг авч байна.

Орос улсад төрөлтийн тоо сүүлийн 25 жилийн хамгийн доод түвшинд хүрч, нас баралт өссөөр байгаа тул гурав ба түүнээс дээш хүүхэдтэй гэр бүлийг "норм" гэж үзэхийг ерөнхийлөгч Путин уриалж буй.

Дашрамд дурдахад, тус улсын үр хөндөлт хийдэг эмнэлгүүдэд Үнэн алдартны шашны тэргүүнээс хүүхэд төрүүлэх нь ямар их баяр баясгалантай, азтай, ивээгдсэн зүйл болохыг сурталчилсан захидал очих болсон. Мөн тус захидалд шашны сүмүүдээс авч болох тусламж, улсаас олгох халамжийг хэрхэн авах арга замуудыг заасан байдаг.