"Монгол Улсын нийгэм, эдийн засагт Эрдэнэт үйлдвэр ТӨҮГ-ын үзүүлж буй нөлөө, хувь нэмэр" сэдэвт судалгааны ажлын тайлан танилцуулах хурал өнөөдөр /2024.12.11/ боллоо. Энэ үеэр Эрдэнэт үйлдвэр ТӨҮГ-ын ерөнхий захирал Г.Ёндон “Эрдэнэт” үйлдвэр 46 дах жилдээ үйл ажиллагаагаа явуулж байна. Анх 1973 онд 521 сая тонны нөөцтөйгөөр 34 жилийн хугацаанд ашиглах зорилттой, 15000 хүнтэй хотхон байгуулах техник эдийн засгийн үндэслэлтэйгээр бүтээн байгуулалатын ажлыг эхлүүлсэн байдаг. Нөөцийн хувьд дахиад 55 жил буюу 2079 оныг дуустал ашиглах боломжтой гэдгийг бид нар техник эдийн засгийн үндэслэлээр гаргаж ирсэн.

Мөн Оюутын орд дээр хийгдэж байгаа хайгуулын ажлын үр дүнд Эрдэнэт үйлдвэр 2079 оноос хойш дахиад 10 жил ажиллах боломж гарч ирсэн гэж ойлгож болно.

Тэртээ 1990- ээд оны зах зээлд шилжсэн хүнд үед улсын төсвийн орлогын 30 гаруй хувийг дангаараа бүрдүүлж байсан түүх бий. Тэр үед манай орны эдийн засаг цомхон байсан. Харин өнөөдөр тэлж байна. Уул уурхайн салбарын оруулж байгаа орлого, ялангуяа сүүлийн жилийн хугацаанд биржийн хууль, чингэлэг тээврийн терминал зэрэг бодлогын шийдлүүд гарсны дараа улам тэлсээр байна. Эрдэнэт үйлдвэр 2023 оны гүйцэтгэлээр төсвийн орлогын 10 орчим хувийг бүрдүүлсэн бөгөөд 4 их наядыг давсан борлууллатын ашигтай ажилласан. Хоёр их наядыг давсан татвар хураамжийг төсөвт төвлөрүүлсэн. Нийгмийн хариуцлагын хүрээнд улс эх оронд тулгамдсан асуудалд үргэлж оролцоотой явж ирсэн” гэлээ.

Д.Энхбаяр