Өмнөд Солонгост цэргийн онц байдал зарласан өдөр Үндэсний батлан хамгаалахын хорооны яаралтай хуралдааны үеэр гар утсаараа тоглоом тоглож суусан цэргийн өндөр албан тушаалтны бичлэг задарч, шүүмжлэлд өртөөд байна. Түүнийг Агаарын цэргийн хүчний хошууч генерал Чой гэж таамаглажээ. Чой цэргийн онц байдлын хэрэгтэй шууд хамааралгүй боловч чухал цаг үед зохисгүй авир гаргасан нь шүүмжлэл дагуулав.

Тэрбээр арванхоёрдугаар сарын 3-ны Мягмар гаригийн орой 19:40 минутын орчимд таван минут орчим утсаар тогложээ. Бичлэг харвал тэр цэрэг хувцастайгаа, гутлаа тайлчихсан, нэг хөл дээрээ нөгөө хөлөө тавьсан сууна.

Гэхдээ энэ хэрэг хурлын завсарлагааны үеэр болсон бөгөөд түүний эргэн тойронд хэн ч байгаагүй. Гэхдээ хурлыг завсарлагааны үеэр ч таслалгүй шууд дамжуулж байжээ. Шууд дамжуулалт явж байгаа гэдгийг түүнд хэн нэгэн хэлснээр тоглоомоо зогсоосон байна.

21:00 цагт хурал дахин эхлэхэд хууль тогтоогчид түүний үйлдлийг хэлэлцжээ. Сөрөг хүчний Солонгосын ардчилсан намын төлөөлөгч, Үндэсний батлан хамгаалахын хорооны тэргүүн асан Ан Гью-бэк түүнийг хурцаар шүүмжилж, "Улс орон чинь 45 жилийн дараа анх удаа цэргийн онц байдал зарлаад эмх замбараагүй байдалтай байна. Таны ухаан санаа зүгээр үү" гэжээ.

Энэ хуралд Батлан хамгаалах яам болон Штабын дарга нарын нэгдсэн хорооны төлөөлөгчид тэргүүтэй 50 гаруй өндөр албан тушаалтан оролцож байсан. Ан Гью-бэкийн хурц шүүмжлэл нь энэ хурал хэчнээн чухал байсныг онцолжээ. Түүний үйлдлийг шалгаж, хариуцлага тооцно гэдгээ Батлан хамгаалахын дэд сайд Ким Сун-хо мэдэгдэв.

Цахим сүлжээнд энгийн иргэд энэ үйлдлийг хоёр янзаар тайлбарлаж байна. Зарим нь үүнийг хувийн шинж чанартай, хэрэг явдалтай холбоогүй үйлдэл гэж өмөөрсөн бол зарим нь цэргийн удирдах албан тушаалын хүн байж сахилга бат муутай гэж шүүмжилжээ.