Ассадын дэглэм нуран унасны дараа Сири дэх цэргийн эд хөрөнгийг устгах ажиллагаа явуулж буйгаа Израиль мэдэгдэв. Тодруулбал, Израилийн ерөнхий сайд Беньямин Нетаньяху Ням гаригт Голаны өндөрлөг болон Сирийн голд орших хамгаалалтын бүсийг эзлэн авах тушаал буулгасан болохыг мэдээлж байсан. Үүний хүрээнд Сирийн шинэ засгийн газрын хүчин чадлыг мэдэхгүй ч болзошгүй заналхийллээс сэргийлэн тус улсын цэргийн байгууламжийг устгах болно гэж Нетаньяху болон Израилийн Батлан хамгаалах хүчин (IDF)  мэдэгдсэн юм.

"BBC" агентлаг Даваа гаригийн шөнө Сирийн Аль-Байда болон Латакиа боомтуудад "IDF"-ийн агаарын хүчин цохилт өгсөн гэж мэдээлэв. Энэ нь тус улсын тэнгисийн цэргийн флот бөгөөд 15 хөлөг онгоц дэлбэрэлтийн улмаас сүйрснийг харуулах зураг мөн нийтэлсэн байна.

Израиль уг халдлагыг үйлдсэнээ хүлээн зөвшөөрсөн бөгөөд Сири даяар 350 гаруй удаа агаараас цохилт өгч, Голаны өндөрлөг дэх хамгаалалтын бүсэд хуурай замын цэргийн анги оруулснаа мэдэгдэв.

Батлан ​​хамгаалахын сайд Израил Катц мэдэгдэлдээ, Израиль улсыг заналхийлж буй стратегийн хүчин чадлыг устгахыг зорьж байна гэсэн юм. Түүнчлэн, Сирийн флотыг устгах ажиллагаа агуу амжилттай болсон гэдгийг онцолж,  Дамаск, Хомс, Тартус, Пальмира хотуудын нисэх онгоцны буудал, цэргийн машин, агаарын довтолгооноос хамгаалах зэвсэг, зэвсгийн үйлдвэрлэлийн газрууд зэрэг өргөн хүрээний байд цохилт өгсөн гэж  мэдэгджээ.

Ерөнхий сайд Нетаньяху ерөнхийлөгч Башар Ассадыг огцруулсан Сирийн босогчдод хандан видео бичлэг илгээжээ.  Тэрбээр уг видео бичлэгтээ "Хэрэв Ираны сэргээн босголтод тусалж, террорист бүлэглэлүүдэд нь дэмжлэг үзүүлэх юм бол Израиль хүчтэй хариу арга хэмжээ авах болно" гэж мэдэгдсэн байна.

Бусдаар Сирийн шинэ засгийн газартай энх тайвны харилцаа тогтоох хүсэлтэй байгаагаа илэрхийлж, босогчдын дайралтыг ард түмнээ хамгаалах гэсэн үйлдэл гэж үзэж байснаа онцолсон байна.

Гэсэн хэдий ч Сирийн хүний ​​эрхийн ажиглагч байгууллагын (SOHR) үүсгэн байгуулагч Рами Абдул Рахман тэнгисийн цэргийн флот болон бусад Сирийн цэргийн дэд бүтцийг устгаж буй Израилийг буруутгаж байна. Энэхүү цохилтууд нь Сирийн өөрийгөө хамгаалах хүчин чадлыг устгаж, газар нутгийнх нь тогтвортой байдлыг зөрчсөн үйлдэл гэж Рахман үзжээ. Мөн ирээдүйд ямар нэгэн байдлаар шинэ засгийн газрын эсрэг гадаадын хүч дайрах юм бол сиричүүдэд өөрсдийгөө хамгаалах боломжийг үгүй хийж байна гэж онцолсон.

Израилийн Гадаад хэргийн сайд Гидеон Саар Даваа гаригийн орой хийсэн цохилтуудын талаар тайлбарлахдаа, "Манай улс иргэдээ хамгаалахад бүх анхаарлаа хандуулж байна. Тийм ч учраас бид химийн зэвсэг, алсын тусгалын пуужин, тэсрэх бөмбөг зэрэг стратегийн зэвсгийн системүүдийг хэт даврагч террористуудын гарт оруулахгүйн тулд устгаж байна" гэсэн юм.

НҮБ-ын Химийн хяналтын байгууллага Сирийн шинэ эрх баригчдад химийн зэвсгийн сэжигтэй нөөцийг аюулгүй байлгах тал дээр мөн анхааруулга өгчээ. Учир нь ерөнхийлөгч асан Ассад их хэмжээний химийн зэвсгийг нөөцөлж, хадгалсан гэж таамаглаж буй.