Хүнс, хөдөө аж ахуй, хөнгөн үйлдвэрийн сайдаар Ж.Энхбаяраас ЕАЭЗХ-нд элсэх асуудлаар болон салбарын төсвийн талаар тодрууллаа.

Тэрбээр "Цар тахал гэж айхтар зүйлийг монголчууд туулсан. Бид хөл хорионд 1-2 сар болоход картын бараанд орохоос өөр аргагүй байдалд хүрч, гадаад худалдаанаас хэт хамааралтай болсон гэдгийг харуулсан. Энэ асуудалд Үндэсний аюулгүй байдлын зөвлөл дүн шинжилгээ хийж, Төрийн тэргүүн санаачлан "Хүнсний хувьсгал" хөтөлбөрийг хэрэгжүүлэхээр УИХ-ын 36 дугаар тогтоол гарсан. Ингэснээр дотооддоо тодорхой нэр төрлийн барааг заавал тарьж, ургуулдаг, бүтээгдэхүүнээ боловсруулах зорилтыг тавьж ажилласан. Нийт 2.5 жил хугацаанд хэрэгжиж, маш сайн үр дүн гарч байна.

Хөдөө аж ахуйн гаралтай бүтээгдэхүүний экспорт нэг их наядаар нэмэгдэж, гадаадаас худалдан авдаг бараа 250 тэрбум төгрөгөөр багасч байна.

Олон мянган ажлын байр бий болж, шинээр 25 үйлдвэрийг байгуулж, өргөтгөл хийлээ. Ард түмнээ эрүүл аюулгүй хүнсээр хангах зорилт маш амжилттай хэрэгжиж байгаа. Энэ бодлогыг дэмжихээр Атрын дөрөвдүгээр аян, Шинэ хоршоо хөдөлгөөн, Цагаан алт гэх дөрвөн бодлого цогцоороо хэрэгжиж байна. Мах, гурил, сүү, өндөг, тахиа, гахай гээд ойролцоогоор 40 нэр төрлийн бараа бүтээгдэхүүний багц байгаа. Шингэн хүнс бол дотооддоо бүрэн хэрэгцээгээ хангаж байгаа. Энэ дотоодын үйлдвэрүүдээ хамгаалах нь салбар яамны үүрэг. Энэ талаарх бодлого, тайлбараа цаашаа хүргүүлнэ. Нөгөө талаар гэрээ үргэлжилж байгаа. Мэдээж, арьс шир, ноос ноолуурын салбаруудад таатай нөлөө гарч байгаа. Тэгэхээр энэ хэлэлцээр дээр битгий туйлшраарай. Бараа бүтээгдэхүүний нэр төрөл болгон дээр яриа хэлэлцээ хийж, эерэг сөрөг талыг нь тооцоолно. Хэлэлцээр үргэлжлэх ёстой.  Бид бүс нутаг дахь хэд хэдэн олон улсын байгууллагуудад элсэхээ хойшлуулж байгаа. Цаг нь болоогүй. Эерэг сөрөг үр дагавар, нөлөөг тооцож дуусаагүй байна. Тийм учраас Аюулгүй байдлын хамтын ажиллагааны байгууллагад бид орохгүй. Шанхайн хамтын ажиллагааны байгууллагад ажиглагчаар оролцоно. Евроазийн эдийн засгийн холбоонд Монгол элсэхгүйгээр зөвхөн хоёр талын гэрээ хэлэлцээр, түр туршилтын гэрээнүүдийг хийж байгаа. Үүнээс гарах үр дагаврыг тооцоолж, дараагийн гэрээ хэлэлцээрийг хийнэ гэсэн маш бодолтой, нарийн тооцоололтой, болгоомжтой алхмыг хийж байгаа гэв.