Сирийн Ерөнхийлөгч Башар аль-Ассадын засгийн газар Ням гаригт нуран унасан нь ажиглагчдын санааг зовоож байжээ. Учир нь АНУ-д террорист бүлэг гэж нэрлэгдэх босогчид энгийн иргэдэд халдаж, их хэмжээний хохирол учруулна гэж төсөөлж байсан ч бодит байдал дээр нөхцөл байдал тайван байгаа аж.

Иргэний дайнаас болж дүрвэсэн олон мянган дүрвэгчид эх орондоо эргэн ирэх болж, Ерөнхий сайд Мохаммад Гази Жалали засгийн эрхийг тайван замаар шилжүүлэхэд бэлэн байгаагаа мэдэгджээ.  Гэсэн хэдий ч бослогыг удирдаж байсан Хаят Тахрир аш-Шам шилжилтийн үеийн засгийн газрын ирээдүй тодорхойгүй хэвээр байгааг онцолжээ. Удирдагч Абу Мохаммед аль-Голани Дамаскийг эзлэн авсныхаа дараа олон нийтэд хандаж үг хэлэхдээ үндэсний эв нэгдлийг уриалсан.

Тэрбээр хэлэхдээ "13 жилийн зовлон, шаналал 11 өдрийн дотор дуусаж болдгийг бид нүдээрээ харлаа" гэсэн юм.

Сирийн иргэний дайны үеэр 6.8 сая хүн дүрвэсэн гэх тооцоо бий. Үүний гурван сая нь Турк руу дүрвэсэн бөгөөд Ассадын дэглэм нуран унасны дараа Анкарагийн эрх баригчид босогчдын ялалтыг хүндэтгэж, энх тайвныг чухалчилна гэдгээ илэрхийлжээ. Тус улсын Гадаад хэргийн сайд Хакан Фидан Сирийн ирээдүйн засаг захиргааг Турк дэмжиж байгаагаа баталж, эв нэгдэл, сэргээн босголтыг онцлон тэмдэглэв. Ираны зүгээс Сирийн шинэ эхлэлийг тогтворжуулахад туслахаа амласан бол НҮБ , Япон, АНУ зэрэг олон улсын удирдагчид энх тайван, хүмүүнлэгийн хөгжил дэвшилд найдаж байгаагаа илэрхийллээ.