Өмнөд Солонгосын эрх баригчид өнгөрсөн долоо хоногт цэргийн онц байдал зарласан Ерөнхийлөгч Юн Сук Ёлд хилийн хориг тавьжээ. Прокуроруудын зүгээс Ерөнхийлөгчийг эх орныхоо эсрэг бослого гаргасан гэх хэрэгт шалгаж байгаа тул гадаад руу дүрвэхээс нь болгоомжилж, хориг тавихыг санал болгосон байна.

Хэдийгээр, Бямба гаригт /2024.12.07/ Үндэсний ассамблейн импичмент санал хураалтаас эрх баригч намын тусламжтайгаар Юн Сук Ёл мултарч чадсан ч түүний улс төрийн карьер хавцлын ирмэгт иржээ. Тус улсын Авлигатай тэмцэх газар Даваа гаригт Юн Сук Ёлд хилийн хориг тавих саналыг баталсан аж. Батлан хамгаалах сайд асан Ким Ён Хен цэргийн онц байдал зарлахыг Юн Сук Ёлд санал болгосон гол хүн гэж буруутгагдаж буй. Түүнд хилийг хориг тавьснаас гадна мөн адил ардчиллын эсрэг бослого гаргасан гэх хэрэгт шалгагдаж байна.

Цагдаагийн байгууллагын мэдээлснээр, мөрдөн шалгалтын ажил дуусах хүртэл сайд асан Ким Ён Хеныг саатуулах болсон.

Өмнөд Солонгосын тусгай хүчний командлагч өнгөрсөн долоо хоногт онц байдал зарласны дараа цэргүүдээ парламент руу дайрах тушаал өгсөндөө уучлалт хүссэн байна. Тодруулбал,  707 тусгай ажлын хэсгийн командлагч, хурандаа Ким Хён Тэ Даваа гаригт хийсэн хэвлэлийн бага хурал дээр "Ерөнхийлөгч Юн Сук Ёл цэргийн онц байдал зарласны дараа Үндэсний ассамблей руу цэргүүдээ оруулах тушаал буулгасан нь миний чадваргүй, хариуцлагагүй командлагч болохыг тодорхойлсон. Энэхүү үйлдлээрээ би тушаалыг минь дагасан цэргүүд, тэдний ар гэр болон улс төрийг удирдан чиглүүлэх хууль тогтоогчдыг маш их аюулд оруулсан" гэж мэдэгджээ. Тэрбээр мөн Батлан хамгаалах асан Ким Ён Хеныг буруутгаж, иргэдийн аюулгүй байдлыг хангах ёстой цэргийн хүчинд зүй бус тушаал өгөхийг шаардсан гэв.

Тиймээс тушаал дагасан цэргүүдийнхээ өмнөөс уучлалт гуйж, бүх хариуцлагыг өөрөө үүрнэ гэдгээ мэдэгджээ.