-Ирэх оны төсөвт нийт тамирчдын зардлыг 75 хувь хасах асуудлыг ярьж байна. Би гэхэд 2025 оны календарьчилсан төлөвлөгөөгөөр олон улсын зургаан тэмцээнд оролцох ёстой байсан бол зөвхөн Дэлхийн аварга шалгаруулах тэмцээнд л орох боломжтой болж байна гэсэн үг. Тэгэхээр шинэ залуу тамирчдад сөрөг нөлөөтэй шийдвэр болно. Үндэсний шигшээ багийн шилдэг тамирчид олон улсын тэмцээнд оролцож болох ч залуу тамирчдад тийм боломж байхгүй болно. Тамирчид тэмцээнд оролцож чадахгүй, цалин мөнгөгүй болж, эрх нь зөрчигдөнө. Бидний эрх зүйн орчин доройтох болно. Биднээс эргээд амжилт нэхэхэд хэцүү болно. Энэ асуудлыг эргэж харахыг хүсч байна.

Энэ мөнгөөр амьдарч, амжилт гаргахад бэрх. Тамирчид ардаа амьдралгүй юм шиг л бэлтгэл сургуулилалтаа хийж байна. Уг нь салбарын сайд Ч.Номин сая Парисын олимпоос медаль авсан тамирчидтай уулзаж "2025 оноос Олимпод бэлтгэх үндэсний баг байгуулж, том бүтцээр ажиллана. Тамирчдын хангамж сайжирна. Тиймээс та бүхэн маш сайн амжилт гаргаарай" гэж хэлж байсан. Гэтэл өнөөдрийн байгаа байдал маань тэнгэр газар шиг зөрүүтэй болсон гэв.

-Тамирчин хүн ганцаараа амжилтад хүрдэггүй. Нэг хүний амжилтын ард дасгалжуулагч, бэлтгэл хангагч, багш, эмч, сэтгэлзүйч гээд бараг 50 орчим хүний хүч хөдөлмөр байдаг. Хэрвээ Үндэсний шигшээ багийн тамирчдын зардлыг 75 хувь хасвал ганцхан тамирчин л үлдэнэ.

Бид нэг жилд 6-7 олон улсын тэмцээнд оролцдог байсан бол зардал мөнгөгүйгээсээ болж олимпийн оноогоо цуглуулж чадахгүй нь ээ. Тамирчид азаа үзмээргүй байна. Энэ асуудлыг салбарын сайд, УИХ-ын гишүүн анхаарч үзээрэй. Миний амжилтын ард гэхэд маш олон хүн атгасан гар ажилласан. Спортоор сонирхон хичээллэж, амжилт гаргахаар хичээж буй залуу тамирчдын итгэл найдварыг үгүй хийж байна.

-Ирэх оны төсөвт спортын Үндэсний шигшээ багийн тамирчдын зардлыг 75 хувиар танах асуудлыг хэлэлцэж байна. Үүнийг шигшээ багийн тамирчид эсэргүүцэж байгаа. Бид 2028 оны Лос-Анжелес олимпод оролцохын тулд бүтэн дөрвөн жил бэлтгэл хийн, олон улсын тэмцээнд оролцож, оноогоо цуглуулснаар эрхээ баталгаажуулна.

Тамирчид олимпийн наадамд 30-40 эрхтэй орж, 3-4 медаль авч байна. Ядаж 50-60 эрхтэй олимпод өрсөлдөж, 7-8 медаль авах бодлогыг барьж ажиллах хэрэгтэй байна. Гэтэл эсрэгээрээ тамирчдынхаа төсвийг танах бодлого хэрэгжүүлснээр ирэх 2028 оны олимпод 10 тамирчин орно шүү. Ард иргэдийн зүгээс тамирчдаа дэмжиж, бахархдаг. Тэр амжилтыг нь, урмыг нь төр засгаас хумиж болохгүй. Төсвөө таначихаар тамирчид нэг жилд 1-2 тэмцээнд, дөрвөн жилийн хугацаанд зургаахан тэмцээнд оролцох юм уу. Нэг жилд 7-8 чанартай тэмцээнд оролцсоноор эрхээ авах боломжтой байдаг.