Цахим спортын "CS2" төрлийн хамгийн том тэмцээн болох Мэйжор Шанхай хотноо үргэлжилж байна. Тив, бүс нутаг бүрээс шалгарсан шилдэг 24 багтай эхэлсэн аялал өдгөө сүүлийн бүлэг рүүгээ орж, найман баг тунаж үлджээ. Тэдний нэг нь Монголын "The MongolZ" баг билээ. Тус баг өмнө нь Ази тивийн ямар ч баг үзүүлж байгаагүй түүхэн дээд амжилтад хүрч, тив нэгтнүүдээ баярлуулаад буй.

АВАРГУУД ХАСАГДАВ

Аваргаа хамгаалах зорилготой байсан Украины хүчирхэг "Natus Vincere" баг өчигдөр/2024.12.08/ Норвегийн "HEROIC" багт хожигдож, тэмцээнээ өндөрлүүллээ. "HLTV"-ийн чансаагаар дэлхийд тэргүүлж буй шилдэг багийг ийм эрт гэртээ харина гэж бодож байсан хүн цөөн биз. Тэд энэ жил тун сайн байж, бараг оролцсон тэмцээн бүрийнхээ финалд шалгарсан билээ. Харамсалтай нь, "HEROIC"-ийг барсангүй.

"Mirage" дээр "HEROIC" илүүрхсэн ч "Nuke" дээр болсон тоглолтод "NaVi" хариуг нь барьжээ. Шийдвэрлэх "Ancient" дээр болсон тоглолтод хоёр баг эн тэнцүү тоглож, 9-9 гэсэн харьцаатай байхад "HEROIC" дараалан дөрвөн раунд илүүрхсэн аж.

"NaVi" баг үүнээс өмнө Бразилын "MIBR" болон Оросын "Spirit" багууд хожигдоод байсан юм.

"THE MONGOLZ" БАГ ДАХИН "MOUZ"-ТАЙ ТААРЛАА

Өчигдөр плей-оффын шатанд өрсөлдөх найман багийн нэрс бүрэн тодров. Дэлхийн чансааны эхний арван байрт байгаа багуудаас долоо нь шалгарч, топ арваас гадна ганцхан "Liquid" байна. Одоо багуудад хожигдох эрх үгүй. Ганц л хожигдоход тэмцээнээ өндөрлүүлэх дүрэмтэй.

Плей-оффын тоглолтууд ирэх Пүрэв гаригт эхэлнэ. Монголын "The MongolZ" баг "MOUZ"-тай учраа таарсан. Хоёр баг өмнөх шатанд учраа таарахад "The MongolZ" хожсон. Одоо багууд ганцхан мап бус гурван мап тоглоно. Тэгэхээр үр дүн яаж ч эргэж болно. Мөн эсрэг багийнхаа тоглолтыг судлах, бэлдэх хангалттай хугацаа бий.

"The MongolZ" баг 13 тоглолт дараалан ялаад байна.

Гадаадын мэргэжилтнүүд, тайлбарлагч, аналистууд "The MongolZ"-ийг үнсгэлжингийн үлгэрээ үргэлжлүүлж чадах уу? гэж мэтгэлцэж байна. Зарим нь ч "Одоо хөрсөн дээрээ бууя" хэмээн "The MongolZ"-ийг түрүүлэх багийн хэмжээнд авч үзэхгүй байгаа харагдана.

ПЛЕЙ-ОФФЫН УЧРААНУУД

Гайхалтай буудалтуудаараа онцгойрдог "donk" хүүтэй "Spirit" баг "Liquid"-ийн эсрэг тоглоно. Ялагч нь "The MongolZ" болон "HEROIC"-ийн хожсонтой хагас шигшээд тулна.

Нөгөө талд "G2"-ийн эсрэг "HEROIC". Аваргуудыг гэрт нь буцаасан "HEROIC" баг хүчирхэг "G2"-г хожиж чадах болов уу?

Шөвгийн наймын сүүлийн тоглолт Францын "Vitality" болон олон улсын тамирчидтай "FaZe"-ийн хооронд болно. Өмнөх Мэйжороор финалд хожигдсон "FaZe" энэ удаад хэрхэх вэ? "Vitality" одоогийн байдлаар ямар ч сул талгүй харагдаж байна.

1. The MongolZ – MOUZ
2. Spirit – Liquid
3. G2 – HEROIC
4. Vitality – FaZe