Энэ амралтын өдрүүд Тейлор Свифтийн шүтэн бишрэгчдийн хувьд хөнгөн гунигтай үдэлтийн мөч байх болно. Учир нь түүний "Eras Tour" аялан тоглолт өнөө орой /2024.12.08/ Ванкувер хотноо дуусч байна.

2022 оны арваннэгдүгээр сард анх зарласан аялан тоглолт Тейлор Свифтийн мөрөөдөж, төсөөлснөөс хол давсан үр дүн үзүүлжээ. Энэ хугацаанд тэрбээр 53 хотод 149 шоуг 10.1 сая шүтэн бишрэгчид толилуулсан байна. Очсон газар бүртээ тэр орон нутгийн эдийн засгийг эрчимжүүлж, зарим хот "Eras Tour"-ыг газар хөдлөлттэй хүртэл зүйрлэсэн юм. Зарим цэнгэлдэх хүрээлэнгийн гадаа тасалбаргүй шүтэн бишрэгчид машины зогсоол дээр цугларч дуулж байв.

Тейлор Свифт энэ тоглолтоо амьдралд нь тохиолдож байсан хамгийн ажиллагаа ихтэй атлаа хамгийн баяр баясгалантай, хамгийн ашигтай, хамгийн гайхамшигтай зүйл байсан гэж тодорхойлжээ.

Шүтэн бишрэгчдийнх нь хувьд ч энэ тоглолт дуу хөгжмөөс илүү ихийг өгч чадсан. Тэд хоорондоо нөхөрлөлийн бугуйвч солилцож, танихгүй хүмүүс дундаас насан туршийн найз нөхрөө олжээ. Гэр бүлүүдийн харилцааг ч эерүүлсэн тухай шүтэн бишрэгчид хуваалцжээ. Тухайлбал, нэгэн гэр бүл тасалбарыг бараг 13 сарын өмнө авсан бөгөөд тоглолт эхлэх хүртэл Тейлор Свифтийн талаар хөгжилтэй яриа өрнүүлээгүй өдөр тэдэнд байгаагүй аж.

"Eras Tour" аялан тоглолт Тейлор Свифтийн карьерын үлдсэн хугацааны хэмжүүр болно. Мөн түүний дараагийн алхам, дараагийн эринг шүтэн бишрэгчид болон шүүмжлэгчид анхааралтай ажиглан, хүлээж байна. Түүнийг ойрын хэдэн жилээ аль хэдийнэ бүрэн төлөвлөсөн гэж таамаглаж буй. Өнөө орой тэр ямар нэгэн чухал мэдэгдэл ч хийх магадлалтай аж. Магадгүй тэр шинэ цомгийн мэдэгдэл хийх болов уу. Аль эсвэл тоглолтын турш түүнийг дагалдан явсан зураг авалтын багийнхан баримтат киноны материал цуглуулсан ч байж болох юм. Саяхан гарсан шинэ номдоо тэр "Дараагийн эрин үед уулзацгаая" гэж бичжээ. Тэгэхээр Тейлор Свифтийн шинэ эринг бид хүлээх л үлдлээ.