НЭМЭЛТ:

The MongolZ баг "HEROIC" багийг 2-1 гэсэн харьцаатай буулган авч, плей-оффт шалгарлаа. Ийнхүү Ази тивээс анх удаагаа Мэйжорын плей-оффын шатанд шалгарч байгаа баг нь "The MongolZ" боллоо. Эхний тоглолт "Mirage" дээр болоход "HEROIC" ялсан ч "Anubis", "Ancient" дээр "The MongolZ" дараалан ялж, дараагийн шатны эрхээ авав.

Аварга багийг тодруулах плей-оффын шат арванхоёрдугаар сарын 12-ны өдөр эхэлнэ.

Цахим спортын "CS2" төрлийн дэлхийн аварга гэж хэлж болохуйц Мэйжор тэмцээн Шанхай хотноо эхэлсэн. Өчигдөр/2024.12.05/ хасагдах шатны тоглолтууд эхэлсэн бөгөөд дэлхийн шилдэг 16 үлдээд буй. Ази, Номхон далайн бүс нутгаа төлөөлөн Монголын "The MongolZ" баг цор ганцаараа өрсөлдөж байна.

"The MongolZ" баг түүхэндээ хоёр дахь удаагаа хасагдах шатанд шалгарч, Ази тивээс хамгийн өндөр амжилт үзүүлж байсан Хятадын "TYLOO" багийн амжилтыг дахин давтав. 2018 оны Лондонгийн Мэйжорт тус хятад баг эхний шатаа давж, хасагдах шатнаас 1-3 гэсэн амжилттай тэмцээнээ өндөрлүүлсэн түүхтэй. Тэгвэл "The MongolZ" баг тэдний амжилтыг ахиулж, одоогоор 2-0 гэсэн амжилттай явна.

Мэйжорын аварга, "CS"-ийн бүх цаг үеийн хамгийн шилдэг гэгддэг украин залуу Александр Костилиев буюу "S1mple" Монголын багийн тоглолтыг хараад "Мэйжорын аваргууд шиг тоглож байна" гэж жиргэжээ.

Монголчуудын бахархал болсон багийн тухайд өчигдөр эхлээд "Valve"-ийн чансааг тэргүүлж буй "G2" багийг, дараа нь дэлхийн шилдэг багуудын нэг "MOUZ"-ийг тус тус хожжээ. Өнөөдөр аваргын төлөөх сүүлийн шатанд шалгарахын төлөө "HEROIC" багийн эсрэг тоглоно. Норвеги багийн хувьд мөн 2-0 гэсэн амжилттай байгаа бөгөөд өчигдөр Германы "BIG" болон "FaZe" багуудыг хожсон аж.

Хамгийн сүүлд хоёр баг "Thunderpick World Championship" тэмцээний гранд финалд учраа таарахад "The MongolZ" баг 3-1 гэсэн харьцаатай хожсон билээ.

Хэрэв "The MongolZ" баг өнөөдөр плей-оффын шатанд шалгарч чадвал маргаангүй Азийн бүх цаг үеийн хамгийн шилдэг баг гэж дуурсагдах болно. Дашрамд дурдахад, тэд "Valve"-ийн дэлхийн чансаагаар гуравдугаарт бичигдэж байна. Тэдний дээр "G2" болон "Vitality" багууд л бий.