УИХ-аас 2024 оны нэгдүгээр сард Хүүхэд хамгааллын тухай хуулийн төслийг шинэчлэн баталж байсан бөгөөд өнгөрсөн есдүгээр сарын 1-нээс хэрэгжиж эхэлсэн юм. Уг хуульд хүчирхийлэл үйлдэгдэхээс сэргийлсэн олон зохицуулалт туссаны нэг нь “Эцэг, эх, асран хамгаалагч, харгалзан дэмжигч нь хүүхэд амьдарч байгаа орон байранд архидан согтуурах, эсвэл архи согтууруулах ундаа хэрэглэсэн үедээ нэвтрэхийг хориглоно” гэж заасан. Энэ хуулийн заалтын талаар ГБХНХЯ-ны Хүүхэд, гэр бүлийн хөгжил хамгааллын ерөнхий газрын дарга Т.Ихтамираас тодруулсан юм.

Тэрбээр "Хүүхэд хамгааллын тухай хуулийн шинэчилсэн найруулгаар маш олон зохицуулж байгаагүй нийгмийн харилцааг зохицуулсан. Ингэснээр хүүхэд хамгаалахтай холбоотой хуулийн заалтуудыг тусгасан. Эдгээр зохицуулалтын нэг нь эцэг, эх асран хамгаалагч архидан согтуурсан буюу мансуурсан үедээ тухайн хүүхдийн амьдарч байгаа орон байранд нэвтрэхийг хориглосон.

Хүүхдийн тусламжийн 108 утсанд үл хайхралд өртсөн хүүхдүүдийн дуудлага мэдээлэл их ирдэг. Үүний цаана эцэг эх асран хамгаалагч нь согтуурч, мансуурсан үедээ гэр бүлийн хүчирхийлэл үйлддэг. Нийгэмд гарч буй бодит тохиолдлуудыг үндэслэн энэ судалгааг хийж, хуулийн зохицуулалтыг тусгасан.

Энэ хуулийн заалтыг зөрчвөл Зөрчлийн тухай хуулийн 20.7 дугаар зүйлд заасны дагуу хүүхдийн байцаагч арга хэмжээ тооцно. Үүнээс гадна зөрчлийн шинжтэй үйлдлүүд дээр цагдаагийн байгууллага хамтран ажиллана. Хүүхдийнхээ дэргэд архи уух нь сэтгэл зүй болон хүмүүжилд сөрөг нөлөө үзүүлж, ууж үзэх сэдлийг төрүүлнэ. Ингэснээр хүүхэд гэмт хэрэгт холбогдох эрсдэлийг бий болгоно. Тийм орчинд амьдарч байгаа хүүхдийг хуулиараа эрсдэлт нөхцөл гэж тодорхойлж байгаа. Хууль батлагдвал дагаж мөрдөх чиг үүрэгтэй.

Хэдийгээр Гэр бүлийн тухай хууль батлагдаагүй ч гэр бүл рүү чиглэсэн нийгмийн ажил, үйлчилгээг явуулах талаар 2024 оны тавдугаар сард Гэр бүлд үзүүлэх нийгмийн ажлын үйлчилгээнд тавих стандартыг баталсан.

Өөрөөр хэлбэл, хүүхэд рүү чиглэсэн нийгмийн ажил үйлчилгээ буюу шуурхай тусламжийн хамгаалал, урьдчилан сэргийлэх нийгмийн ажил гэр бүл рүү чиглэсэн ажилтай ижил явагддаг. Тэгэхээр бид гэр бүлд суурилсан хүүхэд хамгааллын асуудал буюу эцэг эх асран хамгаалагчтай ажиллах, тэдний мэдлэг ойлголтыг нэмэх, гэр бүлийн үнэ цэн, үүрэг хариуцлага, хүүхэд өсгөн хүмүүжүүлэх чиглэлээр хүүхдээс гадна эцэг эхтэй давхар ажиллана.

Хүүхдийн тусламжийн 108 утасны нийт дуудлага мэдээллийг өнгөрсөн оны мөн үетэй харьцуулахад 0,7 хувиар буурсан. Дуудлага мэдээллийн тоо буурч байгаа нь сайн. Нөгөө талдаа хүүхэд хамгааллын ажил үйлчилгээний хүрээнд эрсдэлт нөхцөлд байгаа хүүхдийн тоо өссөн. Өөрөөр хэлбэл, илрүүлэлт сайн байна гэсэн үг. Хүүхдээ үл хайхарсан дуудлага мэдээлэл дийлэнх хувийг эзэлдэг" гэв.