Монголын төр нийгмийн нэрт зүтгэлтэн, Хөдөлмөрийн баатар, Ардын багш, Гавьяат хуульч, доктор, профессор Бяраагийн Чимидийн мэндэлсний 90 жилийн ойн хүрээнд “Ардчилсан Үндсэн хуулийн эхийг баригч Б.Чимид” сэдэвт олон улсын эрдэм шинжилгээний хурал Төрийн ордонд үргэлжилж байна. Улсын Их Хурлын дарга Д.Амарбаясгалангийн ивээл дор зохион байгуулагдаж буй энэ удаагийн эрдэм шинжилгээний хурлаар Б.Чимид агсны Үндсэн хуульт ёс, хууль зүйн шинжлэх ухаанд оруулсан хувь нэмэр, түүхэн замнал, дурсамж бүтээлийг алдаршуулж, олон улсын эрдэмтэн судлаачид илтгэл, танилцуулгуудаа хэлэлцүүлэх юм.

Бяраагийн Чимид нь ардчилсан Үндсэн хуулийн төслийг боловсруулах, хэлэлцүүлэх, батлуулахад зарчим, голдрилоосоо хазайлгүй, чигч тууштай зүтгэсэн төдийгүй хожим Үндсэн хуулиа эрхэмлэн дээдлэх ёсыг төлөвшүүлэхэд бүхий л үйл хэргээ зориулсан гэдгийг УИХ-ын дарга илтгэлдээ онцолж байв. Түүнчлэн Б.Чимидийн эхийг барьсан Үндсэн хуульд тунхагласнаар хүний эрхийг дээдэлж, төрийн эрх мэдлийн хяналт тэнцлийг сахиж, хууль дээдлэх ёсыг улам бүр бататгах нь хүн бүрийн үүрэг гэдгийг УИХ-ын дарга Д.Амарбаясгалан тодотгосон юм.

Хурлын үеэр, Монгол Улсын Ерөнхийлөгч асан, академич П.Очирбат ардчилсан Үндсэн хуулиас Б.Чимидийг, мөн Б.Чимидээс Үндсэн хуулийг салгаж үл болно хэмээн дурдаад тэрбээр шинэ Үндсэн хуулийн төслийг 35 сар тархиндаа боловсруулж, 60 хоногийн турш хэлэлцүүлэн батлуулсан түүхэн баримтаас сөхлөө. Профессор Б.Чимидийн сурган хүмүүжүүлэх арга барил, зарчим, мэдлэг туршлагаас Академич С.Нарангэрэл дурсамж илтгэлээрээ дамжуулан танилцуулж, эрх зүйн боловсрол, хууль зүйн шинжлэх ухаанд оруулсан хувь нэмрээс нь онцолсон юм.

Олон улсын эрдэм шинжилгээний хурлаар Монгол дахь Азийн сангийн суурин төлөөлөгч Сара Тэйлор танилцуулсан илтгэлдээ, Б.Чимид агсан тухайн үед Азийн санг Монголд төлөөлөгчийн газраа нээхэд гол үүрэг гүйцэтгэсэн анхдагч хүмүүсийн нэг гэдгийг тэмдэглэн хэлэв. Тэрбээр Ардчилсан Үндсэн хууль боловсруулагчдыг Азийн сан тэргүүтэй олон улсын байгууллагууд дэмжин ажиллаж, иргэдийн оролцоо, олон нийтийн дуу хоолойг нэгтгэж байсан түүхэн туршлагаас хуваалцлаа. Ардчилсан хувьсгалын анхны зүтгэлтнүүдийн нэг Э.Бат-Үүл, нийгмийн тогтолцоо, ардчилсан шилжилтийг тайван замаар амжилттай өрнүүлсэн нь түүхэн ололт гэдгийг онцлоод Б.Чимид тэргүүтэй үзэл санааныхаа төлөө тууштай тэмцэгчид, тухайн үеийн оюун санааны манлайлагчдын гавьяа, зүтгэлийг ямагт санах учиртайг тэмдэглэн хэлсэн юм. УИХ-ын Тамгын газар, Ерөнхийлөгчийн Тамгын газар, Чимид сан, Үндсэн хуулийн цэц, Монгол Улсын Дээд шүүх, ХЗДХЯ, МУИС болон Монголын хуульчдын холбоо хамтран зохион байгуулж буй олон улсын эрдэм шинжилгээний хурал үргэлжилж байна.