Бүгд найрамдах ардчилсан Конго улсад сүүлийн хэдэн долоо хоногийн хугацаанд гарал үүсэл тодорхойгүй учир битүүлэг өвчнөөр 80 орчим хүн нас баржээ. Эрх баригчдын мэдээлж буйгаар тус өвчний шинж тэмдэг нь халуурах, толгой өвдөх, нус гоожих, ханиах, амьсгалахад хүндрэлтэй болох, цус багадах зэргээр ханиадтай төстэй.

Одоогоор 376 өвчтөн байгаагаас 79 нь нас барсан байна. Нас барагсдын олонх нь өсвөр насныхан байжээ.

Өвчин баруун өмнөд Кванго мужид аравдугаар сарын 24-нд анх гарч, нутгийн бусад хэсгээр тархжээ. Тус улсын засгийн газар өвчний шалтгааныг олохоор ДЭМБ-тэй хамтран ажиллаж байгаа бөгөөд бүс нутаг руу шинжээчдийн баг илгээжээ. Өвчний шалтгаан, гарал үүсэл тодорхойгүй тул одоогоор олон хүнтэй газраас зайлсхийх, гараа савандаж угаах зэрэг урьдчилан сэргийлэх ердийн арга хэмжээнүүдийг авч байхыг иргэдэд зөвлөөд байна.