ОХУ-ын ерөнхийлөгч Путины үеэлийн охин бөгөөд Батлан хамгаалахын дэд сайд Ана Цивилёва санаандгүйгээр Кремлийн нууцыг задалжээ. Тэрбээр хууль тогтоогчидтой цахим уулзалт хийх үеэрээ Украинд амиа алдсан цэргүүдийн тоог илчилж орхисон байна. Түүний хэлснээр Кремль сураггүй болсон цэргүүдийн ар гэрээс тэднийг хайж олохыг хүссэн хэдэн арван мянган өргөдөл хүлээж авчээ.

Ана Цивилёва хэлэхдээ "Дотоод хэргийн яам ДНХ-ийн дээжийг өөрийн зардлаар шинжилж, өргөдөл хүссэн ар гэрийнхэнд нь зориулан мэдээллийн сандаа оруулдаг. 48 мянган өргөдөл лав ирсэн" гэжээ.

В.Путин 2023 онд Ана Цивилёваг ахмад дайчдад зориулсан засгийн газрын сангийн хариуцагчаар томилсон. Улмаар мөн ондоо Батлан хамгаалахын дэд сайд болгон дэвшүүлжээ. Ана Цивилёвагийн эцэг нь ерөнхийлөгчийн үеэл Евгений Путин гэх хүн юм.

Цивилёвагийн бичлэг арваннэгдүгээр сарын парламентын сонсголын үеийн бичлэг юм. Түүнийг санаандгүйгээр ам алдсаных нь дараа Батлан ​​хамгаалах хорооны дарга Андрей Картаполов яаран залруулга хийжээ. Тэрбээр Цивилёвагийн яриаг тасалж, "Энэ бол нийтэд дэлгэх ёсгүй маш нууц мэдээлэл. Эдгээр тоо баримтыг хаана ч ашиглахгүй байхыг хичээнгүйлэн хүсье. Энэ бол маш эмзэг, хаалттай мэдээлэл. Эцсийн баримт бичгийг боловсруулахдаа энэ тоонуудыг хаана нь ч оруулж болохгүй" гэж хэлжээ.

Украинд амиа алдсан орос цэргүүдийн тоог үүнээс хамаагүй олон гэж барууны тагнуулын агентлагууд мэдэгдсэн. Дайны талбар дахь хохирлын бодит тоо хэмжээ бол Орос, Украины хэн хэнийх нь хувьд нууц мэдээлэл юм. Гурван жилийн хугацаанд ОХУ-ын 700 мянга гаруй цэрэг нас барсан эсвэл шархадсан гэж барууныхан мэдээлээд буй. Энэ нь 10 гаруй жил үргэлжилсэн Афганы дайнаас ч илүү гарсан хохирол юм. Тухайн үед Кремль Афганистанд 70 мянган цэргээ алдаж байжээ.