Замын хөдөлгөөний удирдлагын төвөөс 2024 оны арванхоёрдугаар сарын 2-ноос улсын дугаарыг олгож эхэлсэн. Ингэхдээ найман шалгуур үзүүлэлтэд хамаарахгүй, түгжрэлд бага нөлөөлдөг тээврийн хэрэгсэлд улсын дугаарыг олгож байна.

Энэ талаар тус газрын Бүртгэлийн хэлтсийн дарга Э.Ниндэвээс тодрууллаа. Тэрбээр "Бид улсын дугаар олгох шалгуур үзүүлэлтээ батлуулж, Хууль зүйн яаманд танилцуулснаар нийтээр дагах хэм хэмжээний акт болсон. Ингэснээр 2024 оны арванхоёрдугаар сарын 2-ноос улсын дугаарыг олгож эхэлсэн. Тухайн шалгуур үзүүлэлтэд хамаарахгүй найман төрлийн тээврийн хэрэгсэлд улсын дугаарыг олгож байна. Тодруулбал, мотоцикл, механизм, зүтгүүр, чиргүүл, цистерн, тусгай зориулалтын автобус, бүх жин нь 3.5 тонноос дээш ачааны тээврийн хэрэгсэл багтаж байна. Өөрөөр хэлбэл, эдгээр тээврийн хэрэгслүүд хотын замын түгжрэлд харьцангуй бага нөлөөлдөг гэсэн үг.

Харин найман шалгуур үзүүлэлтэд бүх жин нь 3.5 тонноос доош суудлын автомашинууд хамрагдаж, цахимаар хүсэлтээ гаргана. Иргэдийн хүсэлтийг хүлээн авах цахим системийг боловсруулж, бэлтгэл ажлыг хангаж байна.

Улаанбаатар хотын улсын дугаар олгох шалгуур нь НИТХ-аас баталсан дээд хязгаар буюу 730 мянгад багтаан олгох зохицуулалттай. Хараахан улсын дугаарыг олгож эхлээгүй байна. Ойрын хугацаанд цахимаар иргэдийн хүсэлт авах ажлыг эхлүүлэхээр ажиллаж байна. Тухайн үедээ мэдээллийг иргэдэд өгнө. Нийт найман шалгуур үзүүлэлт тавигдах хэвээрээ байгаа. Аль болох сүүлд үйлдвэрлэсэн, зүүн хүрдтэй машины эрэмбэ эхэнд байна гэсэн үг. Тэрнээс биш заавал сүүлийн 10 жилд үйлдвэрлэсэн машинаас бусдыг нь хориглож, хязгаарлаагүй" гэсэн юм.

Улаанбаатар хотын түгжрэлийг бууруулах зорилгоор НИТХ-аас 2024 оны хоёрдугаар сарын 8-нд нийслэл хотод олгох тээврийн хэрэгслийн улсын бүртгэлийн дугаарын дээд хязгаарыг 730 мянгаар таслах тогтоолыг баталсан. Дээрх шийдвэртэй холбоотойгоор энэхүү зохицуулалтыг хийж эхлээд буй юм. Мөн нийслэлд тээврийн хэрэгслийн улсын бүртгэлийн дугаар олгоход дараах найман шалгуур үзүүлэлтийг баримтлан, бүртгэнэ.

1. Тээврийн хэрэгслийн өмчлөгч, эзэмшигч нь нийслэлийн оршин суугч иргэн, нийслэлд бүртгэлтэй хуулийн этгээд байх;
2. Өмчлөгч, эзэмшигч нь Авто замын тухай хуулийн 25 дугаар зүйлийн 25.1.4, 25.1.5, 25.2.1, 25.2.4, 25.2.5 заасан төлбөрөө барагдуулсан байх;
3. Зөрчлийн тухай хуулийн 14 дүгээр бүлгийн 14.7 дугаар зүйл дэх зөрчил болон төлбөрөө барагдуулсан байх;
4. Жолоочийн даатгалын тухай хуулийн 5 дугаар зүйлийн 5.1-д заасны дагуу даатгуулсан байх;
5. Тээврийн хэрэгслийн хөдөлгүүрийн экологийн ангилал нь  “евро-4” эсвэл түүнтэй дүйцэхүйц буюу түүнээс дээш байх;
6. Сүүлийн 10 жилийн дотор үйлдвэрлэгдсэн тээврийн хэрэгсэл байх.  /2025 оны 6 дугаар сарын 1-ний өдрөөс/
7. Батлагдсан шалгуур үзүүлэлтээр тогтоосон дэс дарааллын эхэнд байх;
8. Экспортын өмнөх техник хяналтын үзлэгт хамрагдсан байх. /2025 оны зургадугаар сарын 1-ний өдрөөс/

Тээврийн хэрэгслийн улсын бүртгэлийн дугаар олгох дэс дарааллыг дараах шалгуур үзүүлэлтээр цахимаар тогтооно.

• Хүсэлт гаргасан цаг хугацааны дарааллаар;
• Цахилгаан, устөрөгчийн болон эдгээрийн хосолсон тээврийн хэрэгслийг бензин болон дизель хөдөлгүүртэй тээврийн хэрэгслийн өмнө нь байх;
• Тээврийн хэрэгслийн үйлдвэрлэгдсэн огноогоор нь буюу үйлдвэрлэгдээд удаагүй тээврийн хэрэгсэл өмнө нь байх;
• Зүүн гар талдаа жолооны хүрдтэй бол баруун гар талдаа жолооны хүрдтэй тээврийн хэрэгслийн өмнө нь байх;
• Хүсэлт гаргасан иргэн, хуулийн этгээд нь эзэмшил, өмчлөлдөө тээврийн хэрэгсэлгүй бол эзэмшил, өмчлөлдөө тээврийн хэрэгсэлтэй иргэн, хуулийн этгээдийн өмнө нь байх.
• Хүсэлт гаргасан иргэн, хуулийн этгээд нь эзэмшил, өмчлөлдөө авто зогсоолтой бол эзэмшил, өмчлөлдөө авто зогсоолгүй иргэн, хуулийн этгээдийн өмнө байх;
• Шалгуур үзүүлэлтийн дагуу эхний сар улсын дугаар авч чадаагүй жагсаалтад байгаа иргэн, хуулийн этгээдийн дараалал нь дараа сарын хүсэлт гаргагч иргэн, хуулийн этгээдийн өмнө байх.
• Авто тээврийн хэрэгслийн бүртгэлийн дугаарыг дараах аргачлалаар олгоно. Иргэн, хуулийн этгээд Зам, тээврийн хөгжлийн сайдын баталсан /хуучнаар/ “Автотээврийн хэрэгслийн бүртгэл хөтлөх, улсын дугаар олгох журам”-ын дагуу холбогдох бичиг баримтыг бүрдүүлэн тээврийн хэрэгслийн улсын бүртгэлийн дугаар авах хүсэлт гаргана.
• Энэ шалгуур үзүүлэлтийн 4.1-д заасан хүсэлтийг хүлээн авч, сар бүрийн 1-ний өдөр шинээр эрэмбэлэн, дараалал тогтоон, дарааллын дагуу тээврийн хэрэгслийн улсын бүртгэлийн дугаар олгоно.