УИХ-ын гишүүд чуулганы хуралдаандаа идэвх муутай оролцож байгаад  УИХ-ын дарга аргаа барахдаа урамшуулал хүртэл олгохоо хэлсэн. Ингэдээ "муу" сурлагатнуудыг хойгуур суулгаж, хэлэлцэж байгаа асуудалд идэвхтэй оролцож буй гишүүдийг урдуур суулгахаа мэдэгдсэн.

Гэсэн хэдий ч спикерийн үгийг ангийнхан нь "нохой хуцсан" дайтай сонсохгүй байгаад Д.Амарбаясгалан бухимдсан. Тэрбээр “Урд талын эгнээнд суудаг олон удаа парламентад сонгогдсон гишүүдийн суудал одоо ч хоосон байна. Тийм учраас УИХ-ын гишүүд ирсэн ирцээрээ суудлаа эзэлдэг байх зохицуулалт хийхээр журам боловсруулж эхэлсэн. УИХ-ын гишүүдээс ёс зүй, хариуцлагын асуудлыг ард иргэд маш ихээр шаардаж байна. Нийтээр нь харлуулдаг биш  чуулганы хуралдаа идэвхитэй оролцдог, ажил хэрэгч байгаа хүмүүс нь УИХ-ын үйл ажиллагаанд оролцох оролцоогоор нь дэмжиж урамшуулдаг байдлаар дээрх журмыг боловсруулж байна. Олон нийтэд хов хоосон парламентын танхим харуулдаг байж болохгүй.

Хурал эхлээд удаагүй байна. Гэтэл 82 гишүүн ирцэнд бүртгүүлсэн боловч танхимд 60 гаруй гишүүн сууж байна. Өглөө орж ирж бүртгүүлчихээд гараад явчих юм. Нэг сайхан эрт ирдэг ирцтэй. Өдөржин хуралд суухгүй, бүх санал нь эсрэг гардаг гишүүд олон байна.

Шинээр өргөн барьсан төсөв хэлэлцэх үед олон улсын арга хэмжээнд эртнээс төлөвлөж, зайлшгүй оролцоод гадаад томилолттой явж байгаа хүмүүс бий. Тухайлбал, Ерөнхий сайд болон Засгийн газрын гурван гишүүн бий. Бусад Засгийн газрын гишүүд төсөв хэлэлцэхэд бүрэн оролцох ёстой. Б.Дэлгэрсайхан гишүүний гадагшаа явах томилолтын хүсэлт ирсэн. Түүнийг цуцласан. Төсөв хэлэлцэх үеэр сайд нар оролцоогоо бүрэн хангах ёстой. Бид хэчнээн ч удаа төсөв хэлэлцэж байна. Хэн хэнээс үүдэлтэй алдаа дутагдал удаа дараа гарсаар байна гэдэг дээр онцгой анхаарах ёстой.

Төсөв хэлэлцэх үеэр Засгийн газрын гишүүд бүрэн байж төсвийн ерөнхийлөн захирагчийн хувьд оруужл ирсэн төсвөө тайлбарлах хамгаалах үүрэгтэй. Энэ асуудалд онцгой анхаарах шаардлагатай” гэв

УИХ-ын 2024.12.04-ны Лхагва гаригийн ээлжит бус чуулганд  18 гишүүн дараах шалтгаанаар оролцоогүй байна. Тухайлбал, 11 гишүүн гадаад томилолттой, 5 гишүүн эмнэлгийн чөлөөтэй, 2 гишүүн чөлөөтэй буюу нийт 18 гишүүн оролцоогүй байна

Гадаад томилолтой:

1. Хууль зүй дотоод хэргийн сайд Л.Алтангэрэл
2. Шадар сайд Т.Доржханд
3. Соёл, спорт, аялал жуулчлал, залуучуудын сайд Ч.Номин
4. Байгаль орчин, уур амьсгалын өөрчлөлтийн сайд С.Одонтуяа
5. УИХ-ын гишүүн Х.Баасанжаргал
6. УИХ-ын гишүүн Б.Батбаатар
7. УИХ-ын гишүүн Ж.Бямбасүрэн
8. УИХ-ын гишүүн Л.Лувсанжамц
9. УИХ-ын гишүүн Ц.Сандаг-Очир
10. УИХ-ын гишүүн Х.Тэмүүжин
11. УИХ-ын гишүүн Дам.Цогтбаатар

Эмнэлгийн чөлөөтэй:

1. УИХ-ын гишүүн Н.Номтойбаяр
2. УИХ-ын гишүүн П.Батчимэг
3. УИХ-ын гишүүн А.Ганбаатар
4. УИХ-ын гишүүн Д.Ганбат
5. УИХ-ын гишүүн С.Лүндэг

Чөлөөтэй:

1. УИХ-ын гишүүн Ж.Галбадрах
2. УИХ-ын гишүүн Ч.Ундрам