Д.Энхтүвшин:

УИХ-ын гишүүн

-Асуудал байсан байж болно, тэрийг заавал сонгуулийн өмнө өөрөө ялахын тулд ийм байдал үүсгэсэн нь надад ёс зүйгүй үйлдэл юм шиг санагдсан.

Бодит байдал, үр дүнгээс харахад Л.Төр-Од л гэж  харагдаж байгаа. Тэр АТГ-ын Олон нийтийн зөвлөлд байсан, олон хүнийг авлигын хэргээр мэдүүлэг өгч, асуудал үүсгэж явж байсан. Өргөдөл гомдол өгдөг хүн байгаа.

Баривчилгааг өмнө нь ч юм уу аль эсвэл сонгуулийн дараа хийж болох байсан. Энэ үйл явдлыг сонгуультай давхцуулан хийсэн нь ёс зүйгүй үйлдэл. Нэр дэвшиж байгаа хүмүүсийг хооронд нь хагаралдуулах гэсэн,  иймэрхүү хүсэл зорилго байв уу.

Энэ байгууллагыг бизнес эрхэлж байсан хүн удирдмаар байгаа юм. Гэтэл нэг ч олигтой бизнес хийж үзээгүй, төрийн байгууллагуудаар дэнгийн эрвээхэй шиг үсэрч явж байсан хүнээр удирдуулдаг болно гэдэг бизнесийн байгууллагын хувьд би өмнөөс  нь их харамсаж байна.

Манай дүрэм нь өөрөө бас их асуудалтай.  Цаашдаа Танхимын хуулийг өөрчилж, бизнесийн төлөөллийн байгууллагын төлөөлөх чадварыг өөрчлөхгүй бол энэ байдал мөддөө өөрчлөгдөхгүй. Танхимын тухай хуулийг УИХ-аар яаралтай хэлэлцэж, бизнесийн төлөөллийн байгуллагын бүтцийг сайжруулах ёстой гэж бодож байна.

О.Амартүвшин:

Хот байгуулалт орон сууцжуулалтын сайдын зөвлөх 

-МҮХАҮТ бол төрийн байгууллага биш төрийн бус байгууллага.

Д.Энхтүвшин гишүүн өөрөө өөр бодолтой байсан байж болно. Тэр хувь хүний сонголтын асуудал. Бусдын сонголтыг буруутгаж болохгүй. Нэгэнтээ хуралд эрхийнхээ дагуу зориод ирсэн хүмүүсийг “Та нар буруу сонголт хийлээ гэж хэлэх нь өөрөө өнөөдрийн ардчилсан нийгэмд байж болохгүй.

Түүнийгээ улстөржүүлээд тэр буруутай, тэр тусмаа Ерөнхий сайд нөлөөлчихлөө гэж хариуцлагүй үйлдэл гаргах нь зохисгүй байсан. Өөрөө бизнес эрхлэгч биш УИХ-ын гишүүн болсон.

Танхимын цаашдын үйл ажиллагаа хэвийн явахын тулд магадгүй буруу өгсөн ойлголтыг зөв болгохын тулд Д.Энхтүвшин гишүүнийг ул суурьтайгаар асуудалд хандаад мэдэгдлээ зөв болгоод  уучлал гуйгаад  үйл ажиллагааг хэвийн болгоход анхаараасай гэж хүсч байна.

МҮХАҮТ-ыг удирдана гэдэг бол өөрөөсөө маш их цаг, сэтгэл зарцуулж хийдэг ажил. Амаргүй ажил. Энд ямар нэг ашиг хонжоо гэдэг зүйл байхгүй.

Сайн зөв хийж чадвал хувь хүний өөрийн бий болгох түүх, нэр хүндийн асуудал. Ажиллаж чадахгүй бол эсрэгээрээ чөлөөлөгдөнө. Жил гаруйн өмнө МҮХАҮТ -ын хурал болж, оролцсон нийт гишүүдийн олонх дэмжээд Д.Энхтүвшинг ерөнхийлөгч болгосон. Би ч асууж байсан, танхимын гишүүд ч сануулж байсан. “Улс төрийн сонирхол байгаа юу” гэж асуухад “Тийм сонирхол байхгүй л” гэсэн.Тийм ч учраас дэмжлэг авсан байх. Бизнесийн салбарыг төлөөлж чадах, зовлон жаргалыг ойлгох хүн гэж хүлээж авсан байх. Би ч тэгж бодож байсан. Удалгүй УИХ-ын сонгуульд нэр дэвшсэн. Иргэний нийгмийн байгууллагын төлөөлөл байх нь зүйтэй гэдэг хуулийн үзэл санаа явж байсан. Тэрний дагуу ч болсон байх. Гэхдээ өмнөх УИХ -аар УИХ-ын гишүүний хийж болох, болохгүй ажилтай холбоотой зөрчил үүссэн.

Г.ХОРОЛ