Улаанбаатар хотын захирагч Х.Нямбаатар өнөөдөр /2024.12.03/ “Тавантолгой түлш” компанид ажиллах үеэрээ “чойжин” буулгалаа.

Тэрбээр “Танайхыг түшиглэсэн хэд хэдэн төрлийн бизнес явж байна шүү. Миний чихний хажуугаар дэлсч байна.

Мидлинг буюу барьцалдуулагч нийлүүлье гэдэг бизнес явдаг юм байна. Шуудай нийлүүлье гэдэг бизнес явдаг юм байна. Тээвэрт нь оруулаад өгөөч гэдэг бизнес явдаг юм байна.

Хэдүүлээ цаашид ийм зүйлээ өдөр, өдрөөр багасгая. Ирэх жилийн зургаан сарын 1-нээс тээвэр бидэнд хамаагүй, агуулах хамаагүй болно. Борлуулагч өөрөө хүссэн цагтаа хүссэн хэмжээгээрээ машин хөлслөөд, түлшээ аваг.  Тэрнийхээ нэмүү өртгөө нүүрсний үнэд шингээг. Яагаад анхнаасаа халамжийн бүх төрлийн бодлого уялдуулсан юм. Бид нар хүүхэд байхдаа нүүрс түлдэг л байсан. Айлууд нүүрсээ өөрсдөө авдаг л байсан. Хагалж бутлаад түлдэг л байсан. Гэтэл нүүрсийг нь нэг хэмжээтэй болгоод, савлаад, хашааных нь хажуу талд хүргэж өгөөд, агуулахад хадгалаад. Утаа буурсан уу буураагүй. Өөрөөр хэлбэл, хэдүүлээ бодлогын энэ алдааг засахгүй энүүгээрээ явбал олон нийтийн бухимдлыг барьж дийлэхгүй шүү.

Нүүрсний хулгай-2 гэдэг том баримт дэлгэгдэж шалгагдах вий. Өмнөх асуудлаа аудитаар шалгуул, үүнээс хойш хулгай гарах нүх сүвийг хааж явъя. Мөн компанийн 50 хувийг цомхотгоно” гэж мэдэгдээд байна.

Нийслэлийн гэр хороололд түүхий нүүрс түлэхийг хориглосноор Засгийн газар 2019 онд “Тавантолгой түлш” компанийг байгуулах шийдвэр гаргасан. Дээрх шийдвэрийн хүрээнд “Тавантолгой түлш” компани нь Эрчим хүчний яаманд харьяалагдаж ажиллаж байсан бөгөөд 500 гаруй хүнтэйгээр үйл ажиллагаа явуулдаг. Алдагдал ихтэй ажилладгаас болж, өр зээлэндээ баригдсан.

“Тавантолгой түлш” компанийн 500 гаруй ажилтан нь нийслэлийн гэр хорооллын айл өрхүүдийн яндан хөөлөх, зуухны бүрэн бүтэн байдлыг шалгах зэрэг ажлыг хийдэг.

Улирлын чанартай ажилладаг гэх мэдээллийг албаныхан өгч буй. Гэвч нүсэр бүтцээр ажиллахын хэрээр шахааны бизнес цэцэглэсэн гэх асуудал хөндөгдөх болсон. Тэгвэл Улаанбаатар хотын захирагч энэ бүхэнд шүүмжлэлтэй хандаж байгаагийн зэрэгцээ шинэ менежмэнтээр ажиллуулах болно гэдгээ зарлаад байна.

Г.ХОРОЛ