Украинд тулалдахаар ирсэн хойд солонгос цэргүүдийн эхний ээлжинд л ОХУ анхаарал хандуулсан гэдгийг Зеленский хэлжээ. Оросын анхаарал халамж цааш үргэлжлэхгүй гэж тэр үзэж байна. Мөн эхний ээлжийн цэргүүдэд анхаарал тавьсан нь илүү олон цэргийг татах зорилготой гэв.

Тэдэнд муухан анхаарал хандуулах болно гэдгийг Пентагон ч зургадугаар сард анхааруулж байжээ. Тодруулбал, Пентагоны хэвлэлийн нарийн бичиг Пат Райдер “Хэрвээ би Хойд Солонгосын армийн удирдлага байсан бол цэргүүдээ Украины эсрэг хууль бус дайнд илгээх эсэхдээ эргэлзэх байсан” гэжээ.

ОХУ өөрсдийн цэргүүдээ ч тааруухан анхаардаг гэж шүүмжлүүлдэг.

Дашрамд дурдахад, Хойд Солонгосоос 12 мянган цэрэг илгээсэн гэж Зеленский нотолсон бол Өмнөд Солонгос дахь Украины Элчин сайд Дмытро Пономаренко хэлэхдээ 2-3 сар тутамд 15 мянган цэрэг илгээнэ гэж мэдэгджээ. Энэ тооцооллоор бол жилийн дотор 100 мянган хойд солонгос цэрэг Украинд ирнэ гэсэн үг. Түүнчлэн Хойд Солонгосын цэргүүдийг Курск мужид байршуулсан гэж үзэж буй. Тэдний зарим нь хэдийнэ Курскт амь үрэгдсэн болохыг Зеленский мэдэгджээ.

Хойд Солонгос цэргүүдийг дайнд оролцуулах нь Ази тивд аюултай гэдгийг мөн Зеленский сануулсан байна. Тэднийг ОХУ-ын арми дасгалжуулж буй тул дрон ашиглах гэх мэт орчин цагийн дайны талаар ойлголттой болох нь дамжиггүй юм.