Оросын жижиглэн худалдааны салбар, тэр дундаа согтууруулах ундааны худалдаа энэ оны нэгдүгээр сараас аравдугаар сарын хооронд 184.2 сая декалитр хүрч, урьд өмнө байгаагүй дээд амжилт тогтоожээ. Бизнесийн мэдээний "RBC"-ын мэдээлснээр, нэг декалитр нь 10 литртэй тэнцдэг. Энэ онд борлуулсан жижиглэнгийн архины хэмжээ нь 2017 оноос хойш бүртгэгдээгүй хамгийн өндөр үзүүлэлт бөгөөд тус оны нэгдүгээр сараас аравдугаар сарын хооронд худалдаалсан хэмжээнээс 21 хувь өссөн байна. Харин өнгөрсөн оны мөн үеэс 0.8 хувь өссөн болохыг онцолжээ.

Согтууруулах ундааны дотоодын борлуулалтыг задлан үзвэл, энэ онд архи 62.5 сая декалитр худалдаалагдсан нь 2022 онтой харьцуулахад харьцангуй өндөр үзүүлэлт юм.

Дарсны борлуулалтын хувьд 46.9 сая декалитр болж, 2023 оныхоос 0.9 хувиар, 2017 оныхоос 22.5 хувиар өсчээ. Түүнчлэн, оргилуун дарсны борлуулалт 2023 онтой харьцуулахад 10.9 хувиар мэдэгдэхүйц өсч, нийт 16.3 сая декалитр хүрсэн байна. Энэ нь 2017 оныхоос 61 хувиар нэмэгдсэн үзүүлэлт аж. Согтууруулах ундааны дараа ликёр, бусад алкоголь агуулсан бүтээгдэхүүний борлуулалт тэргүүлжээ. Тодруулбал, ликёр өмнөх оноос 16.6 хувь өсч, 13.2 сая декалитр зарагдсан бол виски, ром дарс, джины борлуулалт 11.3 сая декалитр буюу 15.7 хувиар өссөн байна.

Согтууруулах ундааны хэрэглээний өсөлт нь архины хамааралтай хүмүүсийн тоо нэмэгдсэнтэй холбоотой гэж Оросын статистикийн агентлаг дүгнэв.

Учир нь борлуулалт нэмэгдсэн хугацаа нь архинд орсон хүний тоо өсч, үүнтэй холбоотой гэмт хэрэг ихээр гарах болсон цаг үетэй давхацжээ. Мөн сүүлийн 10 жилийн хугацаанд анх удаа согтууруулах ундааны хэрэглээ энэ онд огцом нэмэгдсэн гэж тус агентлагаас онцлоод байна.