ОХУ-ын ерөнхийлөгч Путин энэ оны есдүгээр сарын 3-нд Монгол Улсад айлчилсан. Олон улсын эрүүгийн шүүхийн шүүгчдийн бүрэлдэхүүн аравдугаар сард энэ асуудлаар мэдэгдэл хийхдээ "Оролцогч улсууд болон хувь хүмүүс албан тушаал, харьяалал харгалзахгүйгээр Олон улсын эрүүгийн шүүхийн баривчлах тушаалын дагуу хүмүүсийг баривчлах, хүлээлгэн өгөх үүрэгтэй. Монгол Улс Шүүхтэй хамтран ажиллахгүй байгаа ноцтой байдлыг харгалзан үзэж, энэ асуудлыг оролцогч орнуудын Ассамблейд шилжүүлэх шаардлагатай гэж үзсэн” гэсэн юм.

Монгол Улс тус шийдвэрийг давж заалдах хүсэлтээ гаргаж, Олон улсын эрүүгийн шүүхийн хоёр шүүгчийн эрхийг хасах хүсэлт гаргасан байсан. Гэвч Гаагийн шүүх Монгол Улсын давж заалдах гомдлыг хүлээж авахгүй гэж мэдэгдсэн тухай Азербайжаны "News.az" хэвлэлд мэдээлжээ.

Учир нь энэ гомдол нь хэргийн үндэслэл болон хэрэг хянан шийдвэрлэх ажиллагааны асуудлаар гаргасан албан ёсны шүүхийн шийдвэртэй холбоогүй тул давж заалдах боломжгүй гэж үзсэн байна. Цаашилбал, энэ нь шүүхтэй хамтран ажиллах үүрэгтэй холбоотой нийцлийн үнэлгээ байсан гэжээ. Өөрөөр хэлбэл, энэ нь Монгол Улсыг шийтгэх тухай биш харин шүүхтэй хамтран ажиллах эсэх тухай асуудал байсан гэсэн үг юм.

Дашрамд дурдахад, Олон улсын эрүүгийн шүүх өнгөрсөн оны гуравдугаар сард Путиныг Украины нутаг дэвсгэрээс олон зуун хүүхдийг хууль бусаар албадан гаргасан дайны гэмт хэрэгт буруутган баривчлах тушаал гаргасан. Уг тушаалын дагуу шүүхийн гишүүн 124 улс Путиныг өөрийн нутаг дэвсгэрт хөл тавьсан тохиолдолд баривчлах ёстой. Монгол Улс Ромын дүрэмд нэгдэн орсон улсын хувьд Путиныг хүрэлцэн ирэхэд нь баривчлах үүрэг хүлээсэн. Хүлээсэн үүргээ биелүүлэхээс татгалзсан тохиолдолд Олон улсын эрүүгийн шүүх дүгнэлт гаргаж, оролцогч улсуудын Ассамблейд мэдээлж болно. Дараа нь Ассамблей зохих арга хэмжээг авдаг.