Оросын ерөнхийлөгч Владимир Путин өнгөрсөн Пүрэв гаригт /2024.11.28/ Германы канцлер асан Ангела Меркелиэс уучлалт хүсчээ. Тодруулбал, 2007 онд болсон уулзалтын үеэр Ангела Меркелийг айлгах гэж тэжээвэр нохойгоо авчраагүй гэдгээ Путин илэрхийлж, уучлалт хүсчээ. Нохойноос айдаг гэдгээ нуудаггүй Ангелагийн дурсамж ном Мягмар гаригт /2024.11.25/ нээлтээ хийсэн байна. Канцлер асан 2007 оны уулзалтыг дурсахдаа "Путин эрх мэдлээ мэдрүүлэх гэж гэрийн тэжээвэр том хар лабрадороо авчирсан" гэж бичсэн байсан бөгөөд нохойноос болж тухгүй байгааг харж баярлаж байсан гэж буруутгажээ.

Казахстаны Астана хотод болсон хэвлэлийн хурал дээр Путин хэлэхдээ "Би түүнийг нохойноос айдаг байсныг нь мэдээгүй. Тиймээс би хэвлэл мэдээллийн хэрэгслээр хандаж хэлье. Ангела , намайг уучлаарай. Би чамд сэтгэлийн шарх үүсгэхийг хүсээгүй юм шүү. Харин ч ярилцахад таатай уур амьсгалыг бий болгохыг л хүссэн" гэв.

Түүнчлэн "Бүтэхгүй гэдгийг мэдэж байгаа ч, хэзээ нэгэн цагт чи дахиж ирэх юм бол би ямар ч нөхцөл байдлаас үл шалтгаалан чамд эвгүй санагдах зүйлийг хийхгүй" гэж хэлжээ.

Хэрэв Сочи хотноо 2007 онд Ангела, Путин нар уулзсан зургийг харах юм бол канцлер асан маш тухгүй байгааг харж болно. Путин нохойнд дуртай гэдгээрээ алдартай бөгөөд олон удаа бэлгэнд авч байжээ. Харин Ангела Меркелийг тухгүй болгосон нохойг нь Конни гэдэг бөгөөд Батлан хамгаалах сайд асан Сергей Шойгу ерөнхийлөгч Путинд бэлэглэсэн байдаг.