Криптовалютын бизнес эрхлэгч Жастин Сун "Sotheby’s" дуудлага худалдаанаас 6.2 сая ам.доллараар гадил худалдаж авсан билээ. Ханан дээр наасан энэхүү гадил нь Маурицио Каттеланы 2019 онд бүтээсэн "Инээдмийн жүжигчин" гэх бүтээл юм. Тэрбээр худалдаж авсан гадилаа иднэ гэдгээ мэдэгдээд байсан.

Тэгвэл Жастин Сун Баасан гаригт Хонгконгод хэвлэлийн бага хурал зохион байгуулан, гадил жимсээ идлээ.

Гадил жимс маш амархан мууддаг гэдгийг хүн бүр мэднэ. Тиймээс гадил жимсийг үзэсгэлэнд тавигдах хугацаанд байнга сольдог байжээ. Жастин Сун гадилыг худалдаж авахдаа жимсийг хэрхэн солих гарын авлагыг мөн хүлээн авсан. "Инээдмийн жүжигчин" бүтээлийн гадилыг өмнө нь хоёр ч удаа өөр хүмүүс иджээ. Тодруулбал, 2019 онд уран бүтээлч Дэвид Датуна, 2023 онд Өмнөд Солонгосын нэгэн оюутан гадилыг идсэн байна. Гэвч тэдний хэн нь ч 6.2 сая ам.доллар төлөөгүй. 

Жастин Сун гадилынхаа талаар ярихдаа "Хэвлэлийн бага хурал дээр үүнийг идсэнээрээ урлагийн түүхийн нэг хэсэг болж чадлаа. Өөр бусад гадилнаас хамаагүй амттай байлаа" гэжээ.

Мөн Баасан гаригийн арга хэмжээнд хүрэлцэн ирсэн хүн бүрт нэг нэг гадил жимс болон наалдамхай тууз буюу скочийг дурсган өгчээ.