Израиль, Хезболлагийн хооронд гал зогсоох хэлэлцээрийг өнгөрсөн Лхагва гаригт байгуулсан. Гэсэн ч хэлэлцээрийг үл харгалзан Израилийн арми Ливаны нутаг дэвсгэрт цохилт өгсөн гэх мэдээлэл бий. Израиль гэрээгээ олон удаа зөрчсөн гэж Ливан буруутгаж байна.

Мөн ливанчуудыг өмнөд хэсгийн 60 тосгонд буцаж ирэхгүй байхыг Израиль анхааруулав. Тодруулбал, Израилийн арми буцаж очиж болохгүй газруудыг тэмдэглэсэн газрын зургийг гаргажээ. Тэдгээр тосгоныг зорьсон хэн боловч өөрийгөө аюулд оруулна гэж Израиль мэдэгдсэн байна.

Мөргөлдөөний улмаас нэг сая гаруй ливан хүн орон гэрээ орхин дүрвэсэн. Тэдний олонх нь өмнөд нутгаас ирсэн байв.

Гал зогсоох хэлэлцээрийн хүрээнд АНУ, Франц, НҮБ-ын Ливан дахь түр хүчний төлөөлөгчдийг багтаасан үндэстэн дамнасан хяналтын бүлэг байгуулагдсан. Хяналтын бүлгийн гишүүд хэлэлцээрийн хэрэгжилтэд хяналт тавьж ажиллана. Эргэн сануулахад, Израилийн арми Ливаны нутаг дэвсгэрээс 60 хоногийн дотор гарах ёстой. Энэ хугацаанд гэртээ буцаж очихгүй байхыг Ливаны арми оршин суугчдад сануулжээ.