Хятадын төв хэсэгт ойролцоогоор 1000 метр тонн үнэт метал агуулсан өндөр чанарын алтны хүдрийн орд илрүүлжээ. Тодруулбал, Хунань мужид газрын давхаргаас хоёр км-ын гүнд 40 алтны судал илрүүлснээ Геологийн товчоо мэдээлэв.

Энэхүү нээлтийг ойролцоогоор 600 тэрбум юань буюу 83 тэрбум ам.доллараар үнэлж байна. Цаашилбал, энэ нээлт Өмнөд Африк дахь "South Deep" уурхайн 900 метр тонн нөөцөөс давав. "South Deep" уурхайг бүх алтны нөөцийн эх үүсвэр гэж үздэг. Тиймээс Хятадын шинэ ордыг урьд өмнө байгаагүй хамгийн том, хамгийн ашигтай нөөц гэж тооцох магадлалтай байна.

Өрөмдлөг хийж үзэхэд нэг тонн хүдэрт 138 гр буюу ойролцоогоор таван унц алт агуулагдаж байжээ. Далд уурхайгаас ухсан хүдэр найман грамаас дээш алтны орцтой байвал өндөр агууламжтайд тооцогддог.

Энэ оны эхэн үеийн байдлаар Хятад улс 2000 гаруй тонн нөөцтэй гэдгээрээ дэлхийн алтны зах зээлд ноёрхоод буй. Мөн тус улсын уул уурхайн салбар дэлхийн нийт бүтээгдэхүүний 10 орчим хувийг бүрдүүлж байна. Дээрх судалгааны үр дүнг зарласнаар дэлхийн зах зээлд аль хэдийнэ тэнгэрт хадаад байсан алтны үнэ улам өсөх төлөвтэй байна.