Монголын волейболын холбооны үндэсний дээд лигийн 2024-2025 оны улирал тун сонирхолтой үргэлжилж байна. Нэгдүгээр тойргийн тоглолтууд өндөрлөж, хоёрдугаар тойргийн нээлтийн тоглолтууд Степпе аренад үргэлжилж буй.

Өчигдөр/2024.11.28/ лигийн талбайд нэгэн анхаарал татсан тоглолт болсон нь сүүлийн хоёр жилийн босоо аваргууд болох Натур Бакс багийн эсрэг энэ жил улам хүчирхэгжиж, шинэ өнгө төрхийг бүрэлдүүлсэн SG Hawks баг тоглолоо. Энэ улирал энэхүү хоёр багийн амжилт эрс, тэс байгаа гэхэд хилсдэхгүй. Аваргууд гол тоглогч Т.Хангалыг Тайландын лигт "алдаж", багагүй хохирол амссан. Үүний улмаас ч хөгжөөн дэмжигчдийнхээ хүссэн амжилтыг үзүүлж чадахгүй явна. Харин SG Hawks одоогийн байдлаар лигт нэг ч хожигдоогүй яваа цор ганц баг билээ.

Тоглолтын тухайд эхний ээлжийн тоглолтод SG Hawks илүүрхсэн ч хоёр дахь ээлж дээр Натур Бакс хариуг нь барьж, сетийн харьцааг тэнцүүлсэн. Гэвч гурав болон дөрөв дэх ээлжийн тоглолт дээр хүчирхэг SG Hawks өрсөлдөгчдөө боломж олгосонгүй. Тоглолтын шилдгээр киргизстан легионер Онолбек Каныбек уулуу тодорсон. Өдгөө 33 настай, 197 см өндөртэй тэрбээр аваргуудын эсрэг 17 оноо авахдаа 15-ыг нь цохилтоор, нэгийг нь хаалтаар, нэгийг нь давуулалтаар авчээ.

SG Hawks баг лигийг 8-0 гэсэн амжилттай итгэл төгс тэргүүлж байна.

Дашрамд дурдахад, лигт нэг ч хожигдоогүй явсан Хасу Мегастарс багийн анхны ялагдлыг SG Hawks амсуулсан. Хоёр багийн тоглолт 3-1 гэсэн харьцаатай өндөрлөсөн юм. Одоогийн байдлаар Натур Бакс багийг эс тооцвол SG Hawks багтай ойрхон өрсөлдөөнийг үзүүлсэн баг гарсангүй. Хоёр багийн тоглолт нийт таван сет гарч, тав дахь ээлжийн тоглолтод 15-9 гэсэн харьцаатай SG Hawks хожсон амжилттай.

Энэ жил SG Hawks баг лигт түрүүлэх зорилготой. Өнгөрсөн улирал тэд финалд хүрсэн ч хүч дутуудсан. Энэ удаад дутуугаа гүйцээх бодол бий. Үүнийгээ ч нотлох шиг SG Hawks багийн гол тоглогчид өөрсдийн хүсэлтээр ирэх "Бүх оддын тоглолт"-д оролцохгүй гэдгээ мэдэгдэж, улирлын тоглолтууддаа бүрэн анхаарлаа төвлөрүүлжээ.