Владимир Путины бага охин Луиза Розова Парис хотод нууц нэрээр амьдарч байгааг Украины хэвлэлүүд мэдээлжээ. Луиза Розова буюу Елизавета Олеговна Руднова 21 настай бөгөөд Парист дижэй хийдэг. Украины хэвлэл агаарын тээврийн компанийн олон нийтэд ил дэлгэсэн баримтуудыг ашиглан энэ мэдээллийг олж авчээ.

Түүнийг Путин, Светлана Кривоногих нарын богино хугацааны харилцаанаас төрсөн охин гэдэг.

Светлана Кривоногихийг хэвлэл мэдээллийн хэрэгслээр Путины танил гэж нэрлэдэг бөгөөд Оросын хамгийн баян эмэгтэйчүүдийн нэг. Тодруулбал, түүнийг хөрөнгийг 83 сая фунт стерлинг гэж тооцоолжээ. Тэрбээр Монте-Карлод хэд хэдэн байшин, дарвуулт завьтай бөгөөд Финландын ойролцоох Игора цанын баазын хувь эзэмшдэг. Мөн Оросын элитүүдийн үйлчлүүлдэг "Россия" банкны ТУЗ-ийн гишүүн, Үндэсний хэвлэл мэдээллийн группын захирал юм.

Их Британи улс өнгөрсөн жил Светлана Кривоногихийг Оросын дайныг сурталчилсан гэх үндэслэлээр хориг арга хэмжээнд хамруулжээ.

Луиза Розова 2003 оны гуравдугаар сарын 3-нд төрсөн. Түүний гэрчилгээнд аавынх нь нэрийг бичээгүй ч овгийг нь Владимировна гэжээ. Шинэ төрсөн хүүхдэд нэр өгөх Оросын хуулийн дагуу Путины охид Владимировна овогтой болох учиртай юм. Харин Олег Руднов гэх нууц нэрийг Путины 2015 онд нас барсан дотны найзын нэр гэж үзэж байна. Мөн Розовагийн зургуудыг Путины багийн зургуудтай харьцуулаад төстэй гэж дүгнэжээ.

Дашрамд дурдахад, Путин анхны эхнэр Людмилагаас Мария, Катерина гэх хууль ёсны хоёр охинтой. Путин, Людмила нар 2013 онд салжээ. Мөн тэрбээр уран гимнастикийн тамирчин Алина Кабаевагаас хоёр хүүтэй.