Авлигатай тэмцэх газраас нийслэлийн Хөрөнгө оруулалтын газрын дарга асан С.Цэдэнсодномыг өчигдөр /2024.11.28/ орой баривчлан саатуулжээ. Түүнийг Сөүл-Улаанбаатар чиглэлийн нислэгээр Монголд ирэхэд нь “Чингис хаан” нисэх онгоцны буудалд баривчилсан гэдгийг албаныхан мэдээллээ.

Тэрбээр иргэд, компаниудаас их хэмжээний хахууль авсан байж болзошгүй бөгөөд урьдчилсан байдлаар хахуулийн хэмжээ 200 орчим сая төгрөгөөр яригдаж байгаа гэх мэдээлэл байна. Мөн хуулийн байгууллагаас “Mercedes-Benz” маркийн жийп машин, өндөр үнэтэй амины орон сууц захиалсан зэргийг нь илрүүлсэн бөгөөд эдгээр үл хөдлөх хөрөнгөө ХОМ-тээ мэдүүлээгүй байжээ.

С.Цэдэнсодном нь нийслэлийн Хөрөнгө оруулалтын газрын даргын албанд 2023 оны арванхоёрдугаар сард томилогдсон бөгөөд түүний оронд Б.Мөнхбатыг томилсон байна. Тэрбээр өмнө нь 2018 онд тус газрын даргаар ажиллаж байжээ.