АНУ-ын ерөнхийлөгч Жо Байдены засаг захиргаа армийн бие бүрэлдэхүүнийхээ тоог яаралтай нэмэхийг Украинаас шаардаж байна. Үүний тулд цэрэг татлага зохион байгуулах, тэр дундаа 18 настнуудыг цэрэгт татахаар болгож хуулиа өөрчлөхийг зөвлөжээ. Одоогоор Украины цэрэг татлагын насны доод хязгаар 25 байгаа билээ. Украин цэрэг татлага явуулах юм уу, хангалттай олон цэрэг сургахгүй байгааг Байдены засаг захиргааны албан тушаалтан хэлжээ.

Мөн чөлөөнд гарсан, дүрвэсэн зэрэг шалтгаантай цэргийн насны эрчүүдэд илүү хатуу хандсанаар Украин хүчээ илүү зузаатгаж чадна гэж үзэж байна.

Дайн эхэлснээс хойш АНУ 56 тэрбум гаруй ам.долларын тусламж Украинд үзүүлжээ. Түүнчлэн Байден албан тушаалаа хүлээлгэж өгөхөөсөө өмнө дахин тусламж үзүүлнэ гэж найдаж байна. Зэвсгийн тусламжаас гадна Украины цэргийн тоог нэмэгдүүлэх зайлшгүй шаардлагатай гэж АНУ үзэж байна. Цагаан ордны Үндэсний аюулгүй байдлын зөвлөлийн хэвлэлийн төлөөлөгч Шон Саветт хэлэхдээ "АНУ зэвсгийн тусламжаа үргэлжлүүлэх боловч Украинд одоогийн байдлаар хүн хүч хамгийн чухал байна. Тиймээс армиа өргөжүүлэх зохих арга хэмжээг тэд авбал бидний зүгээс сургалтын чадавхийг нэмэгдүүлэхэд бэлэн байна" гэжээ.

Украинд 160 мянга орчим нэмэлт цэрэг шаардлагатай гэсэн тооцоолол бий. Гэсэн ч АНУ үүнээс илүү олон цэрэг хэрэгтэй гэж үзэж байна. Одоогийн байдлаар Үндэсний гвард болон бусад ангийг оролцуулаад нэг сая гаруй цэрэг Украинд байгаа гэж тооцоолжээ. Украины парламент цэрэг татлагын насыг 27-оос 25 болгон бууруулах хуулийг өнгөрсөн дөрөвдүгээр сард баталсан. Үүнээс өөрөөр дайчилгааны насыг бууруулах бодолгүй байгаагаа Зеленский хэд хэдэн удаа мэдэгджээ.