Трампийн Засгийн газрын үр ашгийн хэлтсийг удирдаж буй тэрбумтан Элон Маск "F-35" сөнөөгч онгоцны хөтөлбөрийг шүүмжилж байна. Тэрбээр "F-35" онгоцнуудыг үеэ өнгөрөөсөн техник гэж нэрлээд оронд нь нисгэгчгүй нисэх онгоцыг дайны ирээдүй бөгөөд үндэсний батлан хамгаалахын ухаалаг хөрөнгө оруулалт гэлээ. Мөн энэхүү хөтөлбөрийг түүхэнд байгаагүй хамгийн муу цэргийн зардал гэж нэрлэв.

"F-35" сөнөөгч онгоцны хөтөлбөр нь 180 тэрбум ам.доллараас хэтэрсэн өртөгтэй. Мөн төлөвлөсөн хугацаанаасаа 10 гаруй жилээр хоцорч яваа хөтөлбөр билээ.

Түүний шүүмжлэл АНУ-ын сансар, батлан хамгаалах, зэвсэг, технологийн томоохон компани болох "Lockheed Martin"-ы хувьцааг гурван хувиар унагасан. Үүний зэрэгцээ "F-35" үнэхээр зайлшгүй шаардлагатай зэвсэг мөн үү, аль эсвэл 1990-ээд оны батлан ​​хамгаалахын төлөвлөлтийн хоцрогдсон үлдэгдэл үү гэсэн маргааныг үүсгэсэн юм.

"Lockheed Martin"-ы бүтээсэн "F-35" нь АНУ-ын арсеналын хамгийн дэвшилтэт байлдааны онгоц боловч үнийн огцом өсөлт, техникийн асуудлаасаа болоод шүүмжлэлд өртөөд байна. Гэсэн хэдий ч 2011 оноос хойш дэлхийн олон оронд 1000 гаруй "F-35"-ыг хэдийнэ нийлүүлжээ. Мөн цэргийн сургуулилалтын үеэр 20-1-ийн харьцаатайгаар дайсны онгоцыг устгаж чадахаа харуулжээ. Өөрөөр хэлбэл, дайсны 20 онгоцыг сөнөөх хугацаанд нэг "F-35" сөнөж байна.

Өдгөө Орос, Украины дайнд ашиглаж буй жижиг нисгэгчгүй нисэх онгоцууд 10-50 мянган ам.долларын үнэтэй. Гэтэл нэг "F-35" онгоц 80 сая ам.долларын үнэтэй байна. Мэдээж нисгэгчгүй нисэх онгоцууд нь хүний оролцоогүйгээр даалгавар гүйцэтгэх, бөөгнөрөн ажиллах чадамжтай гэдгээрээ давуу талтай.

Элон Маскийн шүүмжлэл Пентагоны анхаарлыг нисгэгчгүй нисэх онгоц руу шилжүүлж чадвал "Anduril", "Shield AI", "Palantir" зэрэг Цахиурын хөндийн компаниудад томоохон боломж үүснэ.