ОХУ-ын Аюулгүйн зөвлөлийн нарийн бичгийн дарга Сергей Шойгу тэргүүтэй төлөөлөгчид Кабулд айлчилж, тус улсын өндөр албан тушаалтнуудтай хэлэлцээ хийжээ.

Шойгу энэ үеэр Талибаны удирдагчдад хандан "ОХУ нь Афганистанд тогтвортой энх тайван тогтооход туслахыг хүсч байна. Мөн Афганистанд олон жил цэргийн оролцоотой байгаа гэдэг утгаараа Вашингтон ч сэргээн босголтод тэргүүлэх үүрэг гүйцэтгэх ёстой. Бид Афганистаны ард түмний мөнгө, эд хөрөнгийг буцааж өгөх талаар ярилцаж байна. Миний бодлоор АНУ бол Афганистаныг сэргээн босгоход хөрөнгө оруулах гол байгууллага" гэжээ.

Харин Талибаны удирдагчид Кабулын засгийн газрын эсрэг АНУ-ын хориг арга хэмжээний дарамтыг бууруулахад туслахыг Шойгугаас хүсчээ. Талибууд 2021 онд Афганистанд хяналтаа тогтоосны дараа АНУ болон барууны орнууд тэдэнд шахалт үзүүлж эхэлсэн байдаг. Энэ хүрээнд Талибаны удирдагчдын хөрөнгийг битүүмжилж, зорчих эрхийг нь хязгаарласан юм.

Афганистан дахь ЗХУ-ын есөн жилийн оролцооны нөлөөг Орос одоо ч мэдэрсээр байна. Тухайн үед Зөвлөлтийн 15 мянга орчим цэрэг амиа алджээ.

Дашрамд дурдахад, ОХУ-ын Гадаад хэргийн яам өнгөрсөн сард талибуудыг террорист байгууллагын жагсаалтаас хасах шийдвэр гаргасан ч хууль эрх зүйн зохицуулалт хийх шаардлагатай гэж мэдэгджээ.