Кюүшү башёгийн аварга озэки Котозакүра өнгөрсөн Даваа гаригт уламжлал ёсоор хэвлэлийн бага хуралд оролцлоо. Энэ удаагийн түрүү нь түүнийг ёкозүна цолд ойртуулсан ялалт байв. Өдгөө 27 настай, Чиба мужаас гаралтай тэрбээр башёгийн сүүлийн өдөр озэки Хошорюү С.Бямбасүрэнг давж, түрүүлсэн юм. Хоёр озэки цолтоны хувьд хоёулаа 13 даваа, нэг унаатай байсан нь сүүлийн өдрийн барилдааныг улам өрсөлдөөнтэй, сонирхолтой болгосон. Хэн ялсан нь түрүүлэх байсан учир өндөр ач холбогдолтой байлаа.

Озэки Котозакүра "Үнэхээр догдолж байсан. Гэхдээ юу ч болсон тайван байх хэрэгтэй байсан. Миний бие ч надад захирагдсан. Эргэн тойрны минь хүн бүр л баяр хүргэж, намайг хүрээлчихсэн" гэв.

Котозакүра бол гурван үеийн сүмоч. Түүний өвөө нь анхны Котозакүра бөгөөд ёкозүна цолонд хүрсэн нэгэн. Харин аав нь сэкивакэ Котоновака. Ач хүү нь өвөөгийнхөө дэвжээний нэрийг өвлөн барилдаж буй. Залуу хүүгийн хувьд өвөөгийнхөө цолонд хүрэх туйлын хүсэлтэй.

Хэрэв тэрбээр ирэх нэгдүгээр сарын башёд түрүүлж чадвал ёкозүна цолны болзлоо бараг л хангана. Энэ талаараа тэрбээр "Ёкозүна цолонд ингэж ойртох боломж олон гарахгүй. Тиймээс үүнийг ашиглахын төлөө хичээнэ. Миний цорын ганц сонголт бол энэ цолонд хүрэх. Үүндээ ч бэлдэж, шийдэмгий байж, хамгийн сайнаараа хичээх болно" гэлээ.

Энэ жил Котозакүра шиг дээд зиндаанд 66 даваа авсан бөх үгүй. Мөн тэрбээр ёкозүна цол хүртвэл 2017 оны Кисэносатогоос хойш энэ цолонд хүрсэн анхны япон гаралтай сүмоч болно.