“Бадрах Энержи” ХХК болон Дорноговь аймаг дахь Политехник коллеж хооронд 2023 онд байгуулсан хамтын ажиллагааны санамж бичгийн хүрээнд хандивласан шинэхэн ном, сурах бичгүүдээр 2024 оны 11 дүгээр сарын 22-ны өдөр тус коллеж номын сан хөмрөгөө баяжууллаа.

Коллежийн оюутнуудын сургалтын материалыг өргөжүүлж, гагнуур, цахилгаан зэрэг мэргэжлийн болон хувь хүний хөгжил, гадаад хэлний ном, сурах бичгүүдийг хандивлахын зэрэгцээ Монгол Улсын хэмжээнд  250 гаруй байгууллага ашиглаж байгаа номын сангийн Lib4U программыг 5 жилийн турш ашиглах лицензийн эрхийг мөн гардуулж өгсөн байна.

Талууд хамтын ажиллагаагаа цаашид өргөжүүлэхээр төлөвлөж байгаа бөгөөд үүний хүрээнд, коллежийн оюутнуудад ураны олборлолтын үйл ажиллагаатай  бодитоор танилцах, цаашлаад мэргэжлээрээ ажиллах, хөгжин дэвших өргөн боломжууд бий болох юм. Мөн, газар доор уусган олборлох аргын (ISR) талаарх сургалт зохион байгуулах, сургалтын хөтөлбөр, судалгааны ажлуудад дэмжлэг үзүүлэхээр төлөвлөж байна.  Хамтын ажиллагааг амжилттай хөгжүүлснээр “Бадрах Энержи” компани нь  Монгол Улс дахь  уран олборлолтын анхны төсөлдөө залуу үеийн авъяас, чадвартай боловсон хүчнийг ажиллуулах боломж, бололцоог бүрдүүлж байгаа билээ.

Тайлбар:

“Бадрах Энержи” ХХК болон Дорноговь аймаг дахь Политехник Коллеж хамтран ажиллах тухай санамж бичгээ 2023 онд байгуулсан ба дараах чиглэлүүдээр хамтран ажиллаж байгаа юм. Үүнд:

• Хүний нөөцийн чадавхийг бэхжүүлэх, мөн харилцан туршлага солилцох урт болон богино хугацааны сургалтын хөтөлбөрүүдийг зохион байгуулах.
• Судлаач, инженер, коллежийн ажилтнууд болон оюутнуудад судалгаа хийх, мөн  мэргэжлийн хөгжлийн боломж олгох.
• Оюутнуудад сургалт, үйлдвэрлэлийн дадлага хийх, уурхайтай танилцах нөхцөл бүрдүүлэхийн зэрэгцээ  төгсөгчдийг ажлын байраар хангахад анхааран ажиллах.
• Уран олборлолтын талаар ойлголт, мэдээлэл өгөхийн зэрэгцээ  оюутан, багш нарын хамтарсан төслүүдийг дэмжин  ажиллах.
• Мэргэжилтэй ажилтнуудын чадамжийг дээшлүүлэн бэхжүүлэх богино хугацааны сургалтын хөтөлбөрүүдийг боловсруулан, хэрэгжүүлэх.