Германы канцлер асан Ангела Меркель "ВВС" агентлагт ярилцлага өгч, албан тушаал хашсан 16 жилийнхээ түүхээс хуваалцжээ. Түүнийг канцлер байх үед санхүүгийн хямрал, 2015 оны цагаачдын хямрал, 2014 оны Крымийн мөргөлдөөн зэрэг үйл явдал болсон юм. Тэрбээр "Оростой хийсэн байгалийн хийн гэрээ нь Германы компаниудад тусалж, Москватай энхийг сахиулах зорилготой байсан", "2008 онд Украиныг НАТО-д элсүүлэхийг хориглоогүй бол дайн илүү эрт эхлэх байсан" гэх зэрэг онцлох зүйлсийн талаар ярив.

Түүний хэлснээр хэрэв Украин 2008 онд НАТО-д элссэн бол Украин дахь дайн илүү хурдан эхэлж, байдал улам дордох байсан. Ерөнхийлөгч Путин үүнийг зүгээр хараад суухгүй нь тодорхой байсан аж. Мөн тэр үед Украин одоогийнх шиг бэлтгэл сайтай байхгүй байсан гэв.

Зеленский үүнтэй санал нийлэхгүй байна. Тэрбээр тухайн үеийн Меркелийн шийдвэрийг "Оросыг зоригжуулсан илт буруу тооцоолол" гэж нэрлэжээ.

Меркель Оростой энхийн замаар хамтран ажиллахын тулд чадах бүхнээ хийсэн гэж хэлж буй. Түүнийг ажлаа хүлээлгэн өгснөөс хойш хэдхэн сарын дараа Путин Украин дахь дайныг эхлүүлсэн билээ.

Ангела Меркелийг тухайн үед Италийн ерөнхий сайд асан Маттео Рензи "Европын де-факто удирдагч, Европын холбооны босс" гэж тодорхойлж байв. Тэр бүү хэл "Европын утасны дугаар хэд вэ гэж асуувал хариулт нь Ангела Меркелийн утасны дугаар" гэж хэлж байлаа.