Геополитикийн хурцадмал үргэлжилж буй ч газрын тосны үнэ харьцангуй тогтвортой байна. Өнгөрсөн долоо хоногт газрын тосны үнэ зургаан хувийн өсөлттэй байжээ. Даваа гаригийн байдлаар брент маркийн нефтийн фьючерс 0.23 хувь буюу 17 центээр буурч, баррель нь 75.00 ам.доллар болжээ. Харин АНУ-ын баруун Техас маркийн газрын тосны фьючерс баррель нь 71.01 ам.долларт хүрч, 23 цент буюу 0.32 хувиар буурсан байна.

"ОПЕК+"-ийн уулзалт ирэх сарын 1-нд болно. Энэ уулзалтаар газрын тосны олборлолтын өсөлтийг хоёрдугаар сар хүртэл хойшлуулахаар төлөвлөж байна. Үнийн уналт, эрэлт сул, нийлүүлэлт нэмэгдсэн гэсэн шалтгаануудын улмаас олборлолтын өсөлтийг аравдугаар сараас хойш хойшлуулж байжээ.

ОХУ өнгөрсөн 24 цагийн дотор Украины харвасан найман баллистик пуужинг устгасан гэж мэдэгдсэн. Үүний зэрэгцээ Оросын баруун Калуга муж дахь газрын тосны агуулах цохилтод өртжээ. Харин Иран нефтийн олборлолтоо бууруулахгүйг хичээнэ гэж мэдэгдээд байна. Трампийн шилжилтийн баг түүнийг албан тушаалаа хүлээж авмагц хэдхэн хоногийн дотор хэрэгжүүлэх эрчим хүчний багцыг мөн боловсруулж байгаа аж. Энэ нь АНУ-ын эрэг болон холбооны газар нутагт газрын тосны өрөмдлөгийн хэмжээг нэмэгдүүлэх болно.

Геополитикийн нөхцөл байдлаас хамаараад нийлүүлэлтийн тасалдал тодорхой хугацаанд эрэлтээс давж гарах магадлалтай. Тиймээс дунд хугацаандаа дэлхийн түүхий нефтийн үнэ өсөх хандлагатай байгааг мэргэжилтнүүд хэлж байна.