УИХ-аас баталсан  байсан Монгол Улсын 2025 оны төсвийн тухай хууль болон хамт өргөн мэдүүлэгдсэн хуулиудад Ерөнхийлөгч бүрэн эрхийнхээ хүрээнд хориг тавьснаар аймаг, нийслэл төсвийн хуулиа хэлэлцэх боломжгүй болоод байна.

Хуульд зааснаар аймаг, нийслэлийн Иргэдийн төлөөлөгчдийн хурал арванхоёрдугаар сарын 5-нд багтаан ирэх оны төсвийн хуулиа батлах дэгтэй бол сум, дүүргүүд арванхоёрдугаар сарын 15-ны дотор төсвөө хэлэлцэн батлах ёстой.

Гэвч УИХ хамаг хурдандаа хийн төсвийг хэлэлцэн баталлаа ч арванхоёрдугаар сарын 5-ны өдөртэй уралдан ирэх оны төсвийг баталж мэдэхээр байгаа юм. Тиймээс орон нутгуудын төсвөө батлах цаг хугацааг өөрчлөх шаардлага тулгараад буй юм.

Одоогоор энэ талаар УИХ-аас гаргасан шийдвэр байхгүй, эхний ээлжинд ирэх оны төсвийг хэлэлцэх дэгээ Ёс зүй дэгийн байнгын хорооны хуралдаанаар хэлэлцэн батлахаар төлөвлөж, тус байнгын хороо ирэх Лхагва гариг буюу арваннэгдүгээр сарын 27-нд хуралдахаар товыг нь тогтоожээ.   Өөрөөр хэлбэл, тус байнгын хорооноос хориг тавигдсан төсвийг хэлэлцэх дэгийг баталсны дараа УИХ Монгол Улсын 2025 оны төсвийн хуулийн төслийг хэлэлцэж эхлэх юм. Төсвийн хуулийг тусгай дэгээр хэлэлцдэг тул нийт дөрвөн хэлэлцүүлэг хийх учиртай.

Ерөнхийлөгчийн зүгээс УИХ-д бас нэгэн анхааруулга өгсөн нь, “Хэрвээ УИХ хуулийн дагуу төсвийг хэлэлцэн  батлахгүй бол дахиад ч хориг тавина шүү” гэдгээ мэдэгдсэн.

Иймээс УИХ аль болох хуульд нийцүүлж төсвийг батлахаас аргагүй болж буй.

УИХ-аас ирэх оны төсвийн хуулийн төслийг батлангуут орон нутгууд төсвөө батлах боломжгүй, Ерөнхийлөгчийн “шүүлтүүр”-ээр орж, “Асуудалгүй” гэдэг шийдвэр гарсны дараа төсвөө хэлэлцэх учиртай. Иймээс өнөө жилийн хувьд орон нутгууд ирэх оны төсвийн хуулиа цаг хугацаатай уралдан хэлэлцэн батлах шаардлага тулгарч тэр хэрээр “Бухын доодохыг харж үнэг турна болох вий” гэцгээн шогширцгоож байна.

Г.ХОРОЛ