Гаитигийн зэвсэгт бүлэглэлд элссэн хүүхдүүдийн тоо 70 хувиар өссөнийг НҮБ-ын Хүүхдийн сан өнгөрсөн Ням гаригт анхаарууллаа. Ингэснээр зэвсэгт бүлэглэлийн гишүүдийн бараг тал хувийг хүүхдүүд эзэлж байна.

Гаитичууд улс төрийн тогтворгүй байдлаас болж олон 10 жилийг амаргүй байдалд өнгөрүүлж байна. Тус улсын гэмт бүлэглэлүүд нийслэл Порт-о-Пренсийн 80 хувийг хяналтдаа байлгадаг. Үүнтэй холбоотойгоор сүүлийн саруудад хүчирхийлэл, гэмт хэргийн тоо улам нэмэгдсээр байна. 2023 оноос 2024 оны хоёрдугаар улирлын хооронд гэмт хэргийн тоо эрс нэмэгдсэн. Энэ нь гаити хүүхдүүдийг хамгаалахад улам хүнд хэцүү болж буйг илтгэх юм.

Ядуурал газар авсан, боловсрол эзэмшихэд хүндрэлтэй, чухал дэд бүтцүүд бараг бүгд сүйдсэн, хүчирхийлэл даамжирсан зэрэг нөхцөл байдал нь хүүхдүүдийг зэвсэгт бүлэглэлд элсэхэд түлхэц болж байгаа аж.

НҮБ-ын Хүүхдийн сангийн гүйцэтгэх захирал Кэтрин Рассел мэдэгдэлдээ "Гаити дахь хүүхдүүд харгис тойрогт гацаад байна. Үүний улмаас тэд зэвсэгт бүлэглэлд элсэх нь улам ихэссээр байна. Хүүхдийн аюулгүй байдал, сайн сайхан байдлыг эн тэргүүнд тавьж, хүлээн зөвшөөрч боломжгүй энэ хандлагыг халах ёстой" гэжээ.