Сурвалжлага: УДШ ирэх жилээс Хангарьд ордон руу нүүнэ

Хана, тааз, шалыг нь хуулж, энд тэндгүй барилгын ажил ид өрнөнө. Ажилчид цахилгаан шатаар материалаа зөөж, хэрэггүй эд зүйлсээ гадагш гаргаж байлаа. Сүхбаатарын талбайн баруун талд байрлах "Хангарьд" ордны үүдэнд барилгын хог овоорчээ. Учир нь хотын захиргаа Яармаг руу нүүж, байранд нь Улсын дээд шүүх орохоор засвар хийж буй нь энэ.

“Хангарьд” ордныг нүүлгэх асуудал аль эрт 2013 оноос эхлэн яригдсан. Арав гаруй жил ярьсан нүүдэл суудал 2024 оны есдүгээр сард л шийдэгдсэн юм.

"ХАНГАРЬД" ОРДНЫГ УЛСЫН БҮРТГЭЛИЙН ҮНЭЛГЭЭГЭЭР ШИЛЖҮҮЛСЭН"

Хотын А бүсэд байрлалтай “Хангарьд” ордныг өмнө нь 80 орчим тэрбум төгрөгөөр үнэлж байсан хэрнээ газар, байшин хамтдаа 13.7 тэрбум төгрөгөөр үнэлсэн нь олныг анхаарлыг татаад буй. Нийтдээ 16 давхар 2008 онд ашиглалтад орж байсан энэ барилга Улаанбаатар хотын хамгийн үнэ цэнэтэй байршилд байдаг.

Өмнө нь нийслэл зардал гарган тус ордныг хөндлөнгийн байгууллагаар үнэлүүлэхэд 2018 онд 43.4 тэрбумаар, 2022 онд 79.5 тэрбумын үнэ хүрсэн.

Албаныхны өгсөн мэдээллээр “Хангарьд” ордныг хувьчлах асуудал яригдсан тул 2018 онд доод үнэ тогтоох зорилгоор үнэлгээ хийлгэхэд 43.4 тэрбумаар үнэлэгдсэн. Мөн 2022 онд нийслэлийн Засаг даргын Тамгын газраас зах зээлийн үнийг тодорхойлох замаар үнэлгээ хийлгэхэд 79.5 тэрбум төгрөгт хүрсэн байна. Энэ хоёр үнэлгээний аль нэгээр төрийн өмчид шилжүүлэх боломжгүй байжээ.

Хангарьд ордныг улсын бүртгэл буюу балансад 13.7 тэрбум төгрөгөөр үнэлсэн байдаг аж.

Өнгөрсөн 2022 онд уг байрыг Улсын дээд шүүхэд үе шаттай шилжүүлэх шийдвэр гарсан. Харин Улсын дээд шүүх дахин үнэлүүлээд балансын үнийг өсгөх боломжтой гэдгийг холбогдох мэргэжилтнүүд хэлсэн юм. Энэ талаар нийслэлийн Өмчийн харилцааны газрын дарга В.Оюумаагаас тодруулахад "Нийслэлийн өмчид байсан "Хангарьд" ордныг төрийн өмчийн Улсын дээд шүүхэд шилжүүлсэн.

Ингэхдээ улсын бүртгэл дээрх 13.7 тэрбум төгрөгийн үнэлгээгээр шилжүүлэх саналтайгаар НИТХ-аар дэмжсэн юм. Хуулиараа нийслэлийн өмчийн эзэн нь НИТХ байдаг.

Энэ барилгыг хувьчлах, арилжаалах зорилгогүй учраас улсын бүртгэл буюу балансын үнэлгээгээр орон нутгийн өмчөөс төрийн өмч рүү шилжүүлсэн гэсэн үг. Цаашид барилгын зах зээлийн үнэлгээг нэмэх боломж журмаараа Улсын дээд шүүхэд бий. Холбогдох шийдвэрээ Улсын дээд шүүхэд хүргүүлсэн" гэдгийг хэлсэн юм.

ИХ ЗАСВАРЫН АЖЛЫГ "ГРАНД АВГУШ" ХХК ГҮЙЦЭТГЭЖ БАЙНА

Хотын захиргааг Яармагийн шинэ байр руу нүүлгэхэд 1.5 тэрбум төгрөг зарцуулсан бол Улсын дээд шүүхээс 8.2 тэрбум төгрөгийн тендер зарлаж, "Хангарьд" ордныг засварлаж байна.

Их засварын тендерт "Гранд авгуш" ХХК шалгарч, 7.7 тэрбум төгрөгөөр гүйцэтгэж байгаа гэх мэдээлэл байна.

Харин хотын захиргааны төв байрыг шүүх байгууллагын зориулалтаар засварлах зураг төслийг "Эрхэс констракшн" компани 308 сая төгрөгөөр хийжээ.

Нийт 9774.7 ам.метр талбайтай 16 давхар бүхий “Хангарьд” ордны барилгад нийслэлийн 14 газар, агентлаг үйл ажиллагаа явуулдаг байв. Албаны эх сурвалжийн мэдээллээр ирэх 2025 оны гуравдугаар сард Улсын дээд шүүхийнхэн шинэ ордонд нүүж ирэх гэнэ.

Их засварын ажлыг гүйцэтгэж буй "Гранд авгуш" ХХК 2025 оны гуравдугаар сарын 6-ны өдөр ажлаа бүрэн хийж гүйцэтгэхээр гэрээ байгуулсан байна. Тус компани нь өмнө нь Улсын дээд шүүхийн засварын ажлыг хариуцан хийж байжээ.

Гэрэл зургийг О.Болорсувд

3 сэтгэгдэл

Хариулахаа болих

зочин 35 минутын өмнө 66.181.179.22

Бараг хэрэг хэлэлцэхээ больсон Дээд шүүхийн хэдхэн шүүгчид бүхэл бүтэн ордон ямар хэрэгтэй гэж.
Үүний оронд шүүх хурал хийх байргүй гээд байдаг анхан шатны шүүхүүдээ оруулуулахгүй яасийн !!!
Ядаж шүүх хуралд суух иргэдийнхээ тав тухыг бодох ухаан алга уу мунхагийн туйлуудад.