Пентагон үл мэдэгдэх нисдэг биетийг олон зуун мэдээлэл, тэр дундаа маш сонирхолтой тохиолдлын талаар мэдээлэл авсан гэж мэдэгдэв. Пентагон 2023 оны тавдугаар сараас 2024 оны зургадугаар сарын хооронд 757 үл мэдэгдэх нисдэг биетийн тухай мэдээлэлд Үндэсний тагнуулын газрын даргын албатай /ODNI/ хамтран шалгалт явуулж, тухайн нисдэг биетүүд нь шувуу, агаарын бөмбөлөг, хиймэл дагуул, сансрын хог зэрэг болохыг нь тогтоосноос хойш дахин 1652 шинэ мэдээлэл хүлээн авчээ.

Уг шинэ мэдээллүүдийн тоо өдрөөс өдөрт нэмэгдэж байгаа тул АНУ-ын засгийн газар албан ёсоор үл мэдэгдэх нисдэг биет болон үл мэдэгдэх гажиг гэж нэрлэгддэг хоёр салбарыг каталогжуулж, хянах, судлах хүчин чармайлтаа нэмэгдүүлсэн байна.

Бүх домэйн эмгэгийг шийдвэрлэх албаны /AARO/ захирал Жон Кослоски хэлэхдээ "Шинээр бүртгэгдсэн 1652 тохиолдлын зарим нь Үндэсний аюулгүй байдлын газрын ойролцоо харагдсан тул бид үүнийг маш нухацтайгаар шалгах болно. Гэхдээ өнөөг хүртэл манай байгууллага ямар ч харь гаригийн амьтан, үйл ажиллагаа, технологийн баталгаатай нотолгоог илрүүлээгүй гэдгийг онцлох нь зүйтэй болов уу. AARO-ийн шийдвэрлэсэн тохиолдлуудын аль нь ч дэвшилтэт чадавхи, дэвшилтэт технологийг заагаагүй байна" гэжээ.

"AARO"-ийн хүлээн авсан шинэ мэдээллүүдийн бараг 50 орчим нь агаарын бөмбөлөг, шувуу эсвэл дрон зэрэг дэлхийн эд зүйлс төрөлд хамаарах тул хяналтын ажлыг хаажээ. Одоогийн байдлаар 243 мэдээлэлд шалгалт явуулж байгаа ч ямар нэгэн харь гаригийн гэх шинж тэмдэг илрээгүй байгаа бол 444 мэдээллийг архивд оруулж, ойрын хугацаанд шалгаж эхлэх аж. Уг 444 нь ямар ч аюул заналхийлээгүй цэргийн техниктэй холбоотой гэж үзэж байна.

Харин үлдсэн 21 мэдээлэлд нэмэлт судалгаа, дүн шинжилгээ хийх шаардлагатай байгааг Кослоски онцолжээ.

Тэрбээр "Эдгээр шинэ мэдээллийн зарим нь маш сонирхолтой тохиолдлууд байсан. Миний физик, инженерийн мэдлэг төдийгүй тагнуулын нийгэмлэгийн ойлгохгүй байгаа тохиолдол бүртгэгдсэн. Хэлбэ дүрс нь олон төрөл боловч дрон зэрэг техник хэрэгсэл гэж таамаглаж байна" гэж хэлсэн бөгөөд нарийвчилсан тайлбар өгөөгүй аж. "AARO" үргэлжлүүлэн эдгээр мэдээллийг сайтар судална гэж мэдэгдсэн ч зарим үл үзэгдэгч нисдэг биет сонирхдог хүмүүс засгийн газар санаатайгаар үнэнийг нуун дарагдуулж байна гэж буруутгажээ.