УИХ-ын чуулган, байнгын хороо энэ долоо хоногт хэлэлцэх гол асуудал бол 2025 оны төсөв. Монгол Улсын Ерөнхийлөгч 2025 оны төсөвт бүхэлд нь хориг тавьж, УИХ ч түүнийг нь хүлээж авсан. Өөрөөр хэлбэл, Ерөнхийлөгчийн хориг хүлээж авсан учраас УИХ-аар 2025 оны төсвөө дахин хэлэлцэх учиртай.

Гэвч 2025 оны төсөвт тавьсан Ерөнхийлөгчийн хоригийг УИХ хүлээж авсан ч цаашид төсвөө хэрхэн яаж парламентаар хэлэлцэх дэг, хууль, тогтоомж нь тодорхойгүй болсон. Тиймээс нэг удаагийн журам баталж, төсвөө хэлэлцэх учиртай.

Нэгэнт хоригоо хүлээгээд авчихсан учир нэг удаагийн журмаа боловсруулж, батлуулахад цаг алдахгүй болов уу. Тиймээс одоо хамгийн чухал зүйл бол 2025 оны төсвийн зарлагаасаа юуг хасах вэ, хэний тавьсан хөрөнгө оруулалт, бүтээн байгуулалтуудаас хасах вэ гэдэг хамгийн чухал нь.  Сангийн сайд төсвийн зарлагаа бууруулах боломж бол бий, хөрөнгө оруулалт, зардлаа танан гэдгээ мэдэгдчихсэн. Дараагийн төсвийн төслөө ч хэд хэдэн хувилбараар боловсруулчихсан. Сангийн сайд Б.Жавхлан "Саналын хэмжээнд хэлэхэд урсгал зардал, төрийн байгуулагын бүтэц данхайсан, томорсон үр ашиггүй байгаа эдгээр зүйлүүд дээр Засгийн газар илүү үр дүнтэй байлгах талд тооцоо судалгаа хийж, ямар урсгал зардлыг танаж болох нь вэ, ямар зарим үйл ажиллагааг зогсоож хязгаарлаж болох нь вэ. Ямар хөрөнгө оруулалтыг нэг, хоёр жил хойшлуулж болох нь  вэ гээд ийм дарааллаар саналаа бэлтгээд хүргүүлэхэд бэлэн байна" гэдгээ ч мэдэгдчихсэн.

УИХ-ын гишүүдийн хэлээд буй шиг гадаадад томилолтын зардал, тавилга, ширээний зардлуудаасаа эхлээд, цаашлаад томоохон дүнтэй ч нэн шаардлагатай бус хөрөнгө оруулалтууд, зардлуудаа танах шаардлага үүсч буй.

Тиймээс одоо л УИХ-ын гишүүд 2025 оны төсвөө нэг бүрчлэн уншиж, задалж, нягталж, хамгийн зөв таналтаа хийх шаардлага бөгөөд цаг хугацаа ирж байна.

Парламентын гишүүд нь өөрсдөө хууль зөрчиж, тогтоол баталсан, алдагдал ихтэй төсөв баталснаа хүлээн зөвшөөрчихсөн, Засгийн газар нь ч зардлаа бууруулж, танаж оруулж ирье гэж байгаа цагт өөрийн тойрог, сайдын улс төрийн амбицаа хойшлуулж, улс орны эдийн засгаа бодсон, зөв хөрөнгө оруулалтуудаа эрэмбэлж, нийтийн эрх ашгийн төлөө алдагдалгүй төсөв батлах том үүрэг 126 гишүүнд ирэв. Чухам тиймээс л парламентын гишүүн бүр дахин боловсруулж, өргөн баригдсан төсвийнхөө зүйл, заалт бүр дээр ажиллаж, олон нийтийн өмнөөс ажиллах боломжоо зөв ашиглаж, мэргэжлийнхнээ сонсч, олон улсын байгууллагаас өгсөн зөвлөмжүүдийг нягталж, алдагдалгүй төсөв батлах үүргээ биелүүлэх цаг. Гэхдээ алдагдалгүй төсөв батлах нэрийн дор “Шаардлагатай урсгал зардал, хөрөнгө оруулалтыг танаж, асуудал үүсгэхгүй байх ёстой. Төсөв алдагдалгүй байхдаа гол нь биш үр ашиг муутай урсгал зардлыг танаж гэмээнэ үр дүн гарна” гэж үзэж буй.

УИХ-аас Монгол Улсын 2025 оны төсвийг батлахдаа нэгдсэн төсвийн нийт орлого 33 их наяд, 864 тэрбум, 738.8 сая, нэгдсэн төсвийн нийт зарлага 35 их наяд, 795 тэрбум, 227.3 сая төгрөг бол алдагдал 1 их наяд 930 тэрбум, 488.50 сая төгрөг байхаар хуульчилсан байсан юм.

Ерөнхий сайдыгаа эзгүйчилж, “сөрөг хүчин” байгуулсан УИХ-ын гишүүдэд ч энэ төсвийн таналт хамгийн их хамаатай. Тэд төсөв батлах үеэр ярьж, хэлж байсан, шүүмжилж, эсэргүүцэж байсан зардлуудаа одоо л тануулж, алдагдалгүй төсөв батлуулахын төлөө манлайлан ажлаа хийхийг тань олон нийт хүлээж буй.