Монголын сагсан бөмбөгийн эрэгтэйчүүдийн шигшээ баг ирэх онд болох Азийн аваргад оролцох эрхийн төлөөх ээлжит тоглолтоо Хятадын эсрэг хийлээ. Өнөөдөр/2024.11.24/ Улаанбаатар хотноо UG аренад болсон тоглолтод Хятадын шигшээ баг 90:52 гэсэн харьцаатай хожив.

Тоглолтын эхний үед хоёр баг эн тэнцүүхэн тоглолтыг үзүүлэв. Гэвч хоёрдугаар үеэс эхлэн Хятадын шигшээ баг давамгай тоглолтоо үзүүлж, бага багаар онооны тэргүүллийг авсаар 30 оноогоор илүү гарчээ. Монголын шигшээ багийн хамгаалалт, довтолгоо гуравдугаар үеэс эхлэн илт саарч, эсрэг багтаа хялбар оноо авах, амархан хамгаалах боломжуудыг олгов. Мөн Хятадын шигшээ багийн төвийн тоглогчид будагтай талбайгаа сайтар хамгаалж, "харамч" байлаа.

Монголын шигшээ багаас Г.Эрдэнэцогт 16 оноо авч, багаа тэргүүлжээ. Харин Ху Жинчиү 20 оноо авч, багаа тэргүүлсэн бол түүнээс гадна гурван тамирчин 10-аас дээш оноо авсан аж.

Энэ хэсэгт Японы баг дөрвөн хожилтой болсноор дараагийн шатанд шалгарах эрхээ авсан бол тэдний араас гурван хожил, нэг хожигдолтой Хятад, нэг хожил, гурван хожигдолтой Гуам болон хараахан хожил авч чадаагүй Монгол гэсэн багууд жагсч байна.

Дараагийн тойргийн тоглолтууд 2025 оны хоёрдугаар сард болно. 2025 оны хоёрдугаар сарын 20-ны өдөр Монголын шигшээ баг Гуамын талбайд зочлох бол хоёрдугаар сарын 23-ны өдөр Японы шигшээ баг Улаанбаатар хотноо зочлон тоглох болно.