УИХ-ын Ёс зүйн дэгийн байнгын хорооны ажлын хэсэг Лхагва гариг буюу арваннэгдүгээр сарын 27-нд хуралдаж Засгийн газрын гишүүний албан үүргийг хавсран гүйцэтгэх гишүүний чуулганы ажиллагаанд оролцох журмын төсөл боловсруулах асуудлыг хэлэлцэхээр болжээ.

Сүүлийн өдрүүдэд УИХ-ын төвшинд төдийгүй олон нийтийн зүгээс Давхар дээлтнүүдийн эрхийг хязгаарлах шаардлагатайг сануулах болсон. Тэр дундаа УИХ-аар улсын төсөв хэлэлцэх үед Засгийн газрын сайд нар төсөв бужигнуулж, тойргийнхоо эрх ашгийг хавчуулах тохиолдол гарч буй тул санал гаргахаас эхлээд үг хэлэх эрх, тэр бүү хэл саналаа өгөх эрхийг нь хязгаарлах шаардлагатай гэх асуудал хөндөгдөх болсон.

Хамтарсан Засгийн газар нь 23 сайдтай бөгөөд дөрөв нь яамгүй сайд нар юм. УИХ 126 гишүүнтэй болсноор Засгийн газарт тавих хяналт сайжирч, Засгийн газар нь УИХ-ынхаа дээр гарсан зарчимгүй үйлдийг хязгаарлах зэргээр хяналт бий болно гэж Монгол Улсын Үндсэн хуульдл өөрчлөлт оруулж байсан ч өмнөхөөсөө дээрдсэн зүйлгүй байгаа.

Тэгвэл УИХ-ын Ёс зүйн дэгийн байнгын хорооноос байгуулагдсан ажлын хэсэг энэ асуудлыг журам боловсруулан, батлуулж шийдвэрлэхээр ажлаа эхлүүлжээ.

Г.ХОРОЛ