ДОХ-ын халдвартай иргэн Цэргийн төв эмнэлэгт  хэвтэн эмчлүүлж байгаад нас барсан. Талийгаачийг ДОХ-ын халдвартайг мэдээгүйгээс болж,  задлан шинжилгээ хийсэн эмч нар халдвар авсан байж болзошгүй, мөн бөөрний диализ аппаратыг өвчтөнүүд дамжуулан хэрэглэж байсан тул иргэд ч халдвар авсан байхыг үгүйсгэхгүй гэх асуудал хөндөгдсөн.

Цэргийн төв эмнэлгийн дарга Б.Энх-Одын тайлбарласнаар албан хаагчдаа шинжилгээнд хамруулахад хариу нь сөрөг гарсан байна. Мөн Халдварт өвчин судлалын үндэсний төвөөс тус эмнэлэгт шалгалт хийсэн. Эрүүл мэндийн яамнаас хийж буй шалгалт үргэлжилж байгаа аж.

Харин эмч нарын шинжилгээний дүн гарахаас өмнө Цэргийн төв эмнэлгийн эмнэлзүй эрхэлсэн орлогч дарга, хурандаа Р.Баянмөнх хэвлэлийнхэнд дараах тайлбарыг хийж байв. Тэрбээр "Үйлчлүүлэгч манай эмнэлэгт ес хоног эмчлүүлсэн. Тухайн үйлчлүүлэгч маань нойр булчирхайн цочмог үрэвсэл, бөөрний дутагдал, амьсгалын дутагдал, олон эрхтний дутагдал гэсэн оноштойгоор эмчилгээнд орсон. Тухайн өвчтөн маань Халдварт өвчин судлалын үндэсний төвийн ДОХ, Бэлгийн замаар халдах өвчний тандалт судалгааны албаны хяналтанд байдаг байсан. Тухайн иргэн олон эрхтэний дутагдалтай учраас бөөрний дутагдлыг болон цусан дахь хорт бодисыг шүүх, олон эрхтэнд байгаа хаванг буулгах зорилготойгоор бөөрийг үргэлжлүүлэн орлуулах эмчилгээнд орсон. Эмчилгээг хийхэд нэг удаагийн нэг ширхэг дусал орох боломжгүй битүү системтэй иж бүрдлийг хэрэглэсэн учраас бусад өвчтөнд аппаратаар дамжуулан халдвар тарах эрсдэл байхгүй. Нойр булчирхайн цочмог үрэвсэл, олон эрхтний дутагдал гэсэн оношоороо задлан шинжилгээнд орсон. Задлан шинжилгээ хийсэн эмч нарт халдвар дамжих эрсдэл байхгүй. Задлангийн эмч нар эрүүл ахуй, халдвар хамгааллын дэглэм чанд сахиж, хамгаалах хувцас хэрэгсэлтэй ордог” гэж мэдэгдэж байсан юм.

Г.ХОРОЛ