Газын зурвас дахь дайн үргэлжилсээр, бүс нутаг мянга мянган хүүхдийн оршуулгын газар болоод буйг НҮБ анхаарууллаа. 2023 оны аравдугаар сарын 7-ноос хойш дор хаяг 17400 хүүхэд Газын зурваст амиа алджээ. Энэ нь 30 минут тутамд нэг хүүхэд нас барж байна гэсэн үг. Нуранги дор илүү олон хүүхэд байгаа боловч тэднийг хэдийнэ нас барсан гэж таамаглаж байна.

Нас барсан хүүхдүүдийн нас, нэр зэрэг мэдээллийг "Al Jazeera" агентлаг нэгтгэн харуулжээ.

Эндээс харвал, нэг нас хүрээгүй 710, 1-3 насны 1793, 4-5 насны 1205, 6-12 насны 4205, 13-17 насны 3442 хүүхэд нас барсан байна. Мөн 17 мянга гаруй хүүхэд бүтэн эсвэл хагас өнчин хоцорчээ.

"Save the Children" байгууллага өдөр бүр 10 хүүхэд нэг юм уу хоёр хөлгүй болж байгааг онцоллоо. Тэд бага зэрэг мэдээ алдуулагч, аль эсвэл огт мэдээ алдуулагчгүйгээр мэс засалд орж, хөлөө тайруулж байна. Дайны галд өртөхөөс гадна хүнсний аюулгүй байдлын улмаас олон хүүхэд амиа алдсаар. Ундны усны аюулгүй байдал Газын зурваст хурцадмал асуудал болсон билээ.

"Al Jazeera" агентлаг хүүхдүүдийн хамгийн түгээмэл нэрсийг сонгон авч, тухайн нэртэй хэчнээн хүүхэд нас барсныг мөн тооцоолжээ. Тухайлбал, 439 Ахмед, 71 Бараа, 19 Селин, 46 Дима, 18 Элин, 64 Фара, 935 Мохаммед, 110 Нур гэх зэргээр хүүхдүүд амиа алджээ.