Израилийн ерөнхий сайд Беньямин Нетаньяху, Батлан хамгаалахын сайд Йоав Галлант нарыг баривчлах тушаалыг Олон улсын эрүүгийн шүүхээс Пүрэв гаригт гаргасан. Тэгвэл энэхүү тушаалыг үл тоон Нетаньяхуг Унгарт айлчлахыг урьжээ. Унгарын ерөнхий сайд Виктор Орбан түүнийг урьсан боловч Европын бусад хэд хэдэн орон түүнийг эх оронд нь хөл тавьбал саатуулна гэж мэдэгдэв.

Европын холбооны бүх улс Олон улсын эрүүгийн шүүхийн гишүүн юм. Тиймээс бүгд шүүхийн шийдвэрийг биелүүлэх үүрэгтэй гэсэн үг. Гэвч Европын холбооны хүнд жингийнхэн гэж нэрлэгддэг Герман, Франц улсууд Нетаньяхуг баривчлах эсэхээ мэдэгдээгүй байна. Харин Нидерланд, Итали, Испани, Финланд, Португал, Словени, Ирланд зэрэг улс шүүхийн шийдвэрийг биелүүлнэ гэдгээ мэдэгдсэн байна.

Виктор Орбан баривчлах шийдвэрийн талаар хэлэхдээ "Нетаньяху Унгарт очвол ямар ч эрсдэлд орохгүй. Энэ их хачирхалтай, хүлээн зөвшөөрөх боломжгүй тушаал юм" гэжээ. Түүний хувьд Европын холбооны бусад удирдагчтай үе үе тэрсэлддэг гэдгээрээ алдартай. Тэрбээр Нетаньяхутай ойр дотно харилцаатай ажээ.