Ханан дээр наасан нэг ширхэг гадил жимс дуудлага худалдаагаар 6.2 сая ам.доллараар зарагдсан тухай бид мэдээлсэн билээ. Италийн зураач, шог зохиолч Маурицио Каттеланы "Комедиан” нэртэй уг бүтээлийг Хятадын цуглуулагч, криптовалютын бизнес эрхлэгч Жастин Сун худалдаж авчээ. Дуудлага худалдаанд нийт зургаан хүн оролцсон байна.

Жастин Сун хэлэхдээ "Энэ бол зүгээр нэг урлагийн бүтээл биш. Энэ гадил нь урлаг, хошигнол, крипто валютын хоршилыг илэрхийлдэг. Энэ бүтээл ирээдүйд илүү их хэлэлцүүлэг үүсгэж, түүхийн нэг хэсэг болно гэдэгт итгэлтэй байна" гэжээ.

6.2 сая ам.долларын үнэтэй гадилаа Жастин Сун хэрхэх бол гэж олон нийт сонирхож буй нь дамжиггүй. Энэ талаар тэр хэлэхдээ “Би ойрын хугацаанд гадил жимсээ иднэ. Урлаг, соёлын чухал байр суурийг нь хүндэтгэн энэхүү өвөрмөц бүтээлийг идэх болно” гэжэ.

Гадил жимсээ идсэн ч түүний худалдан авалтын үнэ цэн өөрчлөгдөхгүй гэж үзэж байна. Уг бүтээлийн үнэ цэн нь гадил жимсэндээ биш худалдан авалтад дагалдах гэрчилгээнд оршино гэж “CNBC” гэж мэдээлжээ.