Хятадын "ногоон" тоглоом хүмүүсийг донтуулж байна

Хятадад сүүлийн үед ногоон ирээдүйг дэмжих зорилготой гар утасны аппликейшн тэсрэлт хийж байна. Энэхүү аппликейшний хэрэглэгчид үүнийг тоглоом шиг ашигладаг бөгөөд өөрсдийн оноогоо ахиулахын тулд нэгээс олон гар утас хэрэглэх, өөр хэрэглэгчдэд туслах зэргээр донтжээ.

Ли Юлан гэх 64 настай, тэтгэврийн хөгшин өглөө бүр сэрээд "Ant Forest" гэх аппликейшн дээрээ модоо тарьдаг гэнэ.

"Ant Forest" бол нүүрстөрөгчийн ялгаруулалтыг бууруулах зорилготой бүтээгдсэн гар утасны тоглоом гэж ойлгож болно. Хэрэглэгчид нь тоглоомон дотроо мод тарьснаар Хятадын аль нэг бүс нутагт жинхэнэ мод тарьж байгаа гэсэн үг. Лигийн хэлснээр энэ тоглоом түүний амьдралыг утга учиртай болгожээ.

"Ant Forest" нь олон улсын томоохон арга хэмжээнүүдээс талархал хүртсэн бөгөөд уур амьсгалын өөрчлөлтийг эсрэг тэмцэж буй байгаль орчин болон бизнест ээлтэй бүтээгдэхүүн гэдгээрээ ихэд танигдсан аж. Хэрэглэгчид нь ажил руугаа дугуйгаар явах, алхах эсвэл дахин боловсруулсан бараа, бүтээгдэхүүн худалдан авах замаар оноо цуглуулна. Үүнийг "ногоон эрчим хүчний оноо" гэнэ.

Энэхүү оноогоо ашиглан тоглоомон дотроо мод тарих эсвэл газар хамгаалалтад авах боломжтой. Хамгийн сонирхолтой нь энэхүү тоглоомыг "Alipay" ашиглан тоглодог учир тоглох тусам Alipay-г илүү их ашиглана гэсэн үг. Энэ бол харилцан "win-win".

"Ant Forest"-ийн хэрэглэгчдийн цуглуулсан оноо бүр 1 грамм нүүрстөрөгчийн хийг илэрхийлэх бөгөөд одоогоор тус компани нийтдээ 38 сая тонн оноог тараажээ. Гэхдээ энэ тоглоом алдартай болохын хэрээр хуурах тохиолдлууд ихэссэн гэнэ. Зарим хэрэглэгчид тусгай аппликейшн ашиглаж, оноогоо өсгөдөг бол зарим нь бусад хэрэглэгчдэд мөнгө өгч, оноогоо ахиулдаг аж. Эрчим хүчний оноо зардаг бүлэг хүмүүс ч гарч ирсэн гэнэ.

Лигийн хувьд гурван гар утас ашигладаг. Нэгээр нь тэрбээр модоо усалдаг. Мөн тусгай сэгсэрдэг төхөөрөмж авч, гар утсаа байрлуулжээ. Ингэснээр энэ төхөөрөмжийн тусламжтай Ли илүү их алхаж байгаа мэтээр оноо цуглуулдаг зальтай. Тэрбээр ярихдаа "Энэ сэгсэрдэг төхөөрөмжийг хоёр цаг ажиллуулбал би 18 мянган алхалт авдаг" гэв.

Ли өөрийгөө энэ тоглоомонд донтсон гэж тодорхойлжээ.

Харин "Ant Forest" төслийн удирдагч Ван Шиаин ч хууран мэхлэгчдийн эсрэг хатуу арга хэмжээ авч байна. Тоглоом алдартай болох тусам энэ төслийн анхны зорилго болох уур амьсгалын өөрчлөлтийн эсрэг тэмцэх утга санаа алдагдаж байна гэж тэрбээр үзэж байна. Түүний хэлснээр одоогоор 26 мянга гаруй хэрэглэгчдийн хаягийг хаажээ. Зарим мэргэжилтнүүд "Ant Forest"-ийг шүүмжилж, зүгээр л "Alipay"-д хэрэглэгч татах зорилготой хуурамч төсөл гэж хэлжээ. Мөн 700 сая хэрэглэгчидтэй болсон энэ тоглоомд зориулан зарцуулж буй дата төвүүд болон бусад дэд бүтцийн цахилгааны өртөг, зарцуулалт нь эргээд нүүрстөрөгчийг ихэсгэж байгаа гэв.

2024 оны наймдугаар сарын байдлаар "Ant Forest"-ийн хэрэглэгчид нийт 475 сая жинхэнэ модыг Хятад даяар тарьжээ.

Ant Forest-ийн хэрэглэгчдийн тарьсан модыг сансрын зураглалаас харуулж байна

"ANT FOREST"-ИЙН ТАЛААР ТОВЧХОН

Хэрэглэгч нь 1 грамм нүүрстөрөгчийн хийг бууруулах тутамдаа 1 ногоон эрчим хүчний оноо авна. Оноогоороо өөрийн тоглоомон дотроо мод тарих, түүнийгээ арчлах, ургуулах эсвэл өөр тусгай хэрэгцээт газрыг хамгаалалтад авах боломжтой.

Оноо авахын тулд дараах энгийн алхмуудыг хийхэд л хангалттай.