Энэтхэгийн тэрбумтан Гаутам Адани болон бусад удирдах албан тушаалтныг нарны цахилгаан станц барих төлөвлөгөөтэй холбоотой авлигын хэрэгт буруутгаж байна. Энэтхэгийн ерөнхий сайд Нарендра Модигийн гол холбоотон Адани болон түүний ач хүү Сагар Адани нарын долоон удирдах албан тушаалтан засгийн газрын албан тушаалтнуудад 250 сая гаруй ам.долларын авлига амласан гэж АНУ-ын прокурорууд буруутгав.

“Адани” группийг жил гаруйн өмнө хувьцааны заль мэх, нягтлан бодох бүртгэлийн луйврын хэрэгт буруутгаад байсан. Гэтэл дахин авлигын дуулиан нэмэгдсэнээр тус группт бүртгэлтэй компаниудын хувьцааны үнэ 10-20 хувиар буурч, нийт зах зээлийн үнэлгээ нь 30 тэрбум ам.доллараас доош унажээ.

Эрх баригч Бхаратия Жаната намын гол өрсөлдөгч Энэтхэгийн үндэсний конгресс улс төрийн давалгаа үүсгэж, Аданигийн компаниудад шалгалт явуулахыг уриалав.

Нарны эрчим хүч нийлүүлэх гэрээ нь ойролцоогоор 20 жилийн хугацаанд татвар төлсний дараа хоёр тэрбум гаруй ам.долларын ашиг олох тооцоололтой байна.

“Bloomberg”-ийн мэдээлснээр Адани 85 тэрбум гаруй ам.долларын хөрөнгөтэй ба хөрөнгийн хэмжээгээрээ Азийн хамгийн баян хүн Мукеш Амбанигийн дараа ордог. Тэрбээр очир эрдэнийн наймаагаар ажлын гараагаа эхэлжээ. Өдгөө Адани боомт, эрчим хүч, хэвлэл мэдээлэл, цэвэр эрчим хүч зэрэг гол салбарт компаниудтай болсон.