"Counter Strike"-ийн өнөө цагийн шилдгүүдийн нэг украин залуу Александр Костилиев буюу "s1mple" өөрийн ирээдүйн талаар ярьжээ. Тэрбээр өөрийн телеграм хуудаснааа Falcons багт үргэлжлүүлэн тоглохгүй гэдгээ мэдэгдэж, "Би Falcons-д очихгүй" гэв.

Түүний хувьд саяхан NaVi багаас зээлээр Falcons багт очсон билээ. Очсон зорилго нь Мэйжорын эрх авах байсан ч бүтэлгүйтэж, ердөө ганцхан хожсон гэх амжилттай тэмцээнээ өндөрлүүлсэн. Тэд FaZe, SAW, Gamerlegion багуудад дараалан хожигдож, ECLOT гэх багийг нэмэлт цагт буулган авсан юм.

Falcons багийн дасгалжуулагч Данни Соренсен буюу "zonic"-ийн хэлснээр удахгүй багтаа өөрчлөлт оруулж, бүрэлдэхүүнээ шинэчлэх аж. Тэрбээр "Зарим тамирчид маань явах алхмаа хийх бол зарим нь илүү удаан үлдэнэ. Манай тамирчид ирэх жил олон зүйл өөр байна гэдгийг мэдэж байгаа" гэжээ.

Одоогийн байдлаар Эмил Рэйф буюу "Magisk"-аас бусад Falcons-ийн тамирчид багаас явж магадгүй. Сүүлд гарсан мэдээллээр Никола Ковач буюу "NiKo" ирэх Мэйжорын дараа Falcons-д нэгдэнэ гэх шуум бий. Үүнийг G2 багийн захирал ч баталсан билээ.

Ямартай ч "S1mple" дахин Саудын Арабын баг руу зүглэхгүй шинжтэй. Тэгвэл түүний дараагийн баг хаана бэ? NaVi эргэн үндсэн бүрэлдэхүүндээ дуудах болов уу? Эсвэл түүний гэрээг худалдаж авах баян баг гарч ирэх үү? Энэ мэтчлэн олон сонирхолтой асуултууд биднийг хүлээж байна.